ވޯލްޑް ޓްރެވަލް އެވޯޑް | ރާއްޖެއަށް ފަސް އެވޯޑެއް

"ވޯލްޑް ޓްރެވަލް އެވޯޑްސް އޭޝިއާ އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026" ގައި އިންޑިއަން އޯޝަންސް ލީޑީން ޑެސްޓިނޭޝަނާއެކު ދިވެހިރާއްޖެއިން ފަސް އެވޯޑެއް ކާމިޔާބުކޮށްފި އެވެ.

ކްރޮސްރޯޑް މޯލްޑިވްސްގައި މިރޭ ބޭއްވި ވޯލްޑް ޓްރެވަލް އެވޯޑްސް އޭޝިއާ އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026" ގައި ރާއްޖެއަށް ފަސް އެވޯޑެއް ލިބިފައިވެ އެވެ. 

މި އެވޯޑްތަކުގެ އިތުރުން، ރާއްޖޭގެ 15 އަށްވުރެ ގިނަ ފަތުރުވެރިކަމުގެ ބްރޭންޑްތަކުން ވެސް ވަނީ ރާއްޖެއާއި އިންޑިއާ ކަނޑުގެ އެކި ދާއިރާތަކުން ގިނަ އެވޯޑްތަކެއް ހާސިލުކޮށްފައެވެ. މީގެ ތެރޭގައި ރިސޯޓްތަކާއި، ލަގްޒަރީ ހޮސްޕިޓަލިޓީ، އޭވިއޭޝަން، ޑައިވިންގ އަދި ޒިންމާދާރު ފަތުރުވެރިކަމުގެ ދާއިރާތައް ހިމެނެއެވެ.

މި ހަފުލާގައި ވާހަކަފުޅު ދައްކަވަމުން މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަން އޮނަރަބަލް މުޙައްމަދު އަމީން ވިދާޅުވީ، 1972 ވަނަ އަހަރު އެންމެ ދެ ރިސޯޓާއެކު ފެށުނު ރާއްޖޭގެ ފަތުރުވެރިކަން މިއަދު ދުނިޔޭގެ އެންމެ ކާމިޔާބު އެއް ވާހަކައަށް ވެފައިވާ ކަމަށެވެ. އަދި ވިޒިޓް މޯލްޑިވްސްގެ ސީ.އީ.އޯ އަދި މެނޭޖިން ޑައިރެކްޓަރު ޢަބްދުﷲ ޔާސިރު ފާހަގަކުރެއްވި ގޮތުގައި، މި ލިބުނު ފަސް އެވޯޑަކީ ދިވެހި ފަތުރުވެރިކަމުގެ ވަރުގަދަކަމާއި މުއްސަނދިކަން ރަމްޒުކޮށްދޭ ކަމެކެވެ.   

ދިވެހިރާއްޖެއަކީ 2020 އިން 2025 އަށް ޖެހިޖެހިގެން ހަ އަހަރު ދުނިޔޭގެ އެންމެ ކުރިއަރާފައިވާ މަންޒިލްގެ މަގާމުވެސް ހޯދާފައިވާ ގައުމެކެވެ. ދުނިޔޭގެ 40 އަށްވުރެ ގިނަ ގައުމުން ފަތުރުވެރިކަމުގެ ދާއިރާގެ އިސް ފަރާތްތައް ބައިވެރިވި މި ގާލާ ރަސްމިއްޔާތުގެ ސަބަބުން ރާއްޖޭގެ ފަތުރުވެރިކަން ދުނިޔޭގެ ފެންވަރުގައި އިޝްތިހާރު ކުރުމަށް އިތުރު ފުރުސަތުތަކެއް ވަނީ ލިބިގެންގޮސްފައެވެ.