ގޭންގު ގަތުލުތައް ހުއްޓުވިއްޖެ، އެއީ ކުރެވުނު ބުރަ މަސައްކަތެއް" އިހުސާން

މި ސަރުކާރުން ގޭންގު ކުށްތައް ހުއްޓުވަން ކުރެވުނު މަސައްކަތުން، ގޭންގު މާރާމާރީތަކުގައި މީހުން ގަތުލުކުރުން ހުއްޓުވައި، އެކަމުގައި އުޅޭ ގިނަ ޒުވާނުން ހެޔޮ މަގަށް ގެންދެވިއްޖެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

މިރޭ ކުރިއަށް ދިޔަ "އަހާ" ފޯރަމްގައި ވާހަކަ ދައްކަވަމުން އިހުސާން ވިދާޅުވީ 2007 ވަނަ އަހަރާއި 2023 ވަނަ އަހަރާ ދެމެދު، ކޮންމެ އަހަރަކު 2 އާ 5 އާ ދޭތެރޭ ގޭންގު މާރާމާރީތަކުގައި ޒުވާނުންގެ ފުރާނަ ގެއްލެމުން ދިޔަ ކަމަށެވެ.

މި މައްސަލައަށް ދާއިމީ ހައްލު ގެނައުމަށް އެންމެ ފުރަތަމަ ވެސް ގޭންގުތައް ހިންގާ އޮޕަރޭޓް ކުރަމުންދާ ހިސާބުތަކުގައި އެމީހުންނަށްވުރެ ފުލުހުން ގިނަކޮށް، އެމީހުންނަށް މިނިވަންކަމާއެކު މަގުމަތީގައި ނޫޅެވޭ ގޮތް ހަދާފައިވާކަން އިހުސާން ފާހަގަކުރެއްވި އެވެ.

އިހުސާން ވިދާޅުވީ، ގޭންގުތަކާ ދުރުހެލިވެ، އަމިއްލަ ވިޔަފާރި ފެށުމަށް ނުވަތަ ވަޒީފާތަކަށް ދިއުމަށް އެ ޒުވާނުންނަށް ދިން ފުރުސަތުގައި، ގިނަ ޒުވާނުން ރަނގަޅު މަގު ހިޔާރުކޮށްފައިވާ ކަމަށެވެ.

"މީގެ ނަތީޖާއަކީ ކުރިން ފަލަ ސުރުހީތަކުން ފެންނަ އެތަނުން ވަޅި ޖަހައިފި، މިތަނުން ވަޅި ޖަހައިފި، ތަޅާ މަރާ ވާހަކަތައް މަދުވާނެ މިހާރު،"

"ވޭތުވެދިޔަ ތިން އަހަރުތެރޭ އަދި އެއްވެސް މީހެއްގެ ފުރާނަ ގޭންގު މާރާމާރީތަކުގައި ގެއްލިފައެއް ނުވާނެ،" އިހުސާން ވިދާޅުވި އެވެ.

އިހުސާން ފާހަގަކުރެއްވި ގޮތުގައި، މި ސަރުކާރު އައިފަހުން މިހާތަނަށް 52 ގޭންގު އޮޕަރޭޝަނެއް ހިންގައި 10،450 ފަހަރު މީހުން ޗެކުކޮށް އަދި 517 މީހަކު ހައްޔަރަށް ނަގާފައިވާ ކަމަށެވެ. އަދި އެމީހުންނާ ގުޅުންހުރި 670 ސައިކަލެއް ޓޯކޮށްފައިވާ ކަމަށެވެ.

އޭގެއިތުރުން ކުޑަކުދިން ގޭންގުތަކަށް ރެކްރޫޓްކުރާ 26 ސޭފްހައުސްއެއް ރެއިޑުކޮށް ބަންދުކޮށްފައިވާ ކަމަށާއި، ހޮޓްސްޕޮޓްތަކުގައި އުޅޭ 212 ކުޑަކުދިންނަށް ނަސޭހަތްދީ، އާއިލާއާ ހަވާލުކޮށްފައިވާ ކަމަށެވެ.

މިއީ ފުލުހުންގެ ވަރަށް ބުރަ މަސައްކަތުން ގެނެވުނު ނަތީޖާއެއް ކަމަށާއި، އުންމީދަކީ ގޭންގުތައް އެއްކޮށް ނެތިގެން ދިއުން ކަމަށް އިހުސާން ވިދާޅުވި އެވެ. އަދި ފުލުހުންގެ ނަސޭހަތް ގަބޫލުކޮށް، ވަރަށް ގިނަ ކުދިން އެކަމުން ސަލާމަތްވާން މަސައްކަތް ކުރަމުންދާކަން ވެސް އޭނާ ފާހަގަކުރެއްވި އެވެ.