މަސް ގަންނަން ގެނެވުނު ބަދަލާއެކު މަހުގެ އަގު މަތިކޮށް، 2.3 ބިލިއަން ރުފިޔާ ދޫކޮށްފި

މި ސަރުކާރު ވެރިކަމަށް އައިސް މަސް ގަންނަން ގެނެވުނު ބަދަލާއެކު މަހުގެ އަގު މަތިކޮށް، މަސްވެރިންނަށް 2.3 ބިލިއަން ރުފިޔާ ދޫކޮށްފި އެވެ.

ޕީއެސްއެމް އާއި ރައީސް އޮފީސް ގުޅިގެން ބާއްވާ "އަހާ ފޯރަމް" ގައި ވާހަކަ ދައްކަވަމުން ފިޝަރީޒް މިނިސްޓަރު އަހުމަދު ޝިޔާމް ވިދާޅުވި ގޮތުގައި މި ސަރުކާރު ވެރިކަމާ ހަވާލުވިިއިރު މަސްވެރިންނަށް ނުދީ ގިނަ އަދަދެއްގެ ފައިސާ ހުރި ކަމަށެވެ. ނަމަވެސް އެ ފައިސާ ދައްކާ ހަލާސްކޮށް މާކެޓު އަގުގައި މަސް ގަންނަން ގެނެވުނު ބަަދަލާއެކު މަސް ގަންނަަ އަގު ވަނީ ކިލޯއެއް 20ރ. ފަހަނަ އަޅާ ގޮސް 22ރ. އަށް އުފުލިފަ އެވެ.

"މި ބަދަލާއެކު ވަނީ އަގުގައި ވާދަވެރިކަން އުފެދިފަ. ކުރިން [އެމްޑީޕީ] ވެރިކަމުގައި ގެނައި ބަދަލާއެކު ޕްރައިވެޓް ސެކްޓަރު ގާތްގަނޑަކަށް އޮތީ ހަލާކުވެފަ. ނަމަވެސް މިހާރު ދަނީ ދިރުން ލިބެމުން،" މިނިސްޓަރު ފާހަގަ ކުރެއްވި އެވެ.

މިނިސްޓަރު ޝިޔާމް ވިދާޅުވި ގޮތުގައި މި ގެނެވުނު ބަދަލާއެކު، މަސްވެރިންނަށް 48 ގަޑިއިރު ތެރޭ ފައިސާ ދޫކުރަން ފެށިފަހުން މިހާތަނަށް 1.3 ބިލިއަން ރުފިޔާ ދޫކޮށް މިހާތަނަށް ދޫކުރި ފައިސާގެ ޖުމްލަ ވަނީ 2.3 ބިލިއަން ރުފިޔާ އަށް އަރާފަ އެވެ. 

މީގެ އިތުރުން މިނިސްޓަރު ވިދާޅުވީ ގެނެވުނު އަނެއް ބަދަލަކީ ސަރުކާރުން މިފްކޯ އަށް މަސް ގަންނަން ދެމުން ދިޔަ ސަބްސިޑީ ހުއްޓާލުމެވެ. އަދި މިހާރު މިފްކޯއަކީ އަމިއްލަ ފައިމަތީގައި ހިނގާ ކުންފުންޏެއްކަން މިނިސްޓަރު ފާހަގަ ކުރެއްވި އެވެ.

މިފްކޯ އިން ބޭރުކުރާ މަހުގެ "ރިޖެކްޓް" ގެ މައްސަލާގައި ކުރިން ވަނީ އެ ކުންފުންޏަށް ގިނަ ތުހުމަތު ތަކެއް ކޮށްފަ އެވެ. އަދި ރިޖެކްޓްވާ މަސް ނެޓްވޯކްތަކެއް ބޭނުންކޮށްގެން ވިއްކާ ކަމަށް އޮޑިޓަ ޖެނެރަލްގެ އޮޑިޓުގައިވެސް ކުރިން ފާހަގަވެފައިވެ އެވެ.

މިނިސްޓަރު ޝިޔާމް ވިދާޅުވި ގޮތުގައި އެ މައްސަލަ ހައްލު ކުރަން އެޅި ފިޔަވަޅުތަކާއެކު މިހާރު މަހެއް ރިޖެކްޓްވާނަމަ ވާނީ ރާއްޖެއިންނެވެ. އަދި އެކަން ކުރާނީ މިފްކޯ އިން މަސް އެކްސްޕޯޓް ކުރަން މަސް ބޯޓަށް މަސް ބަރުކުރާ ވަގުތެވެ. އެހެންވެ ކުރިން ކުރި ތުހުމަތު މިހާރު ނުކުރެވޭނެކަން މިނިސްޓަރު ފާހަގަ ކުރެއްވި އެވެ.

"ޝިޕްމެންޓެއް ބޭކުރާއިރު، ޕްރައިވެޓް ކުންފުނިތަކން އެކްސްޕޯޓް ކުރާއިރު، ބޮޑު ބައެއް ރިޖެކްޓްވޭ. މިއަދު އަޅުގަނޑުމެންނެއް މިފްކޯ އިން މަހެއް ބޭރެއް ނުކުރާނެ ބޭރުގެ ބާޒާރުން ރިޖެކްޓް ކުރާނެ. ކުރިން 10 ޕަސެންޓް 12 ޕަސެންޓުން ރިޖެކްޓްވެފައި އެބަހުރި،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ރާއްޖެ އިން ދެމެހެއްޓެނިވި މަސްވެރިކަން ކުރާތާ އެތައް ގަރުނެއްވެފައިވާ ކަމަށާ ނަމަވެސް ރާއްޖޭގެ މަހަށް ލިބެން ޖެހޭ ޕްރިމިއަމް އަގު ދެމެހެއްޓެނިވި ނޫން ގޮތްގޮތަށް މަސް ހޯދާ ގައުމުތަކަށް މިހާރު ދެމުންދާ ކަމަށެވެ. އެހެންކަމުން މިއީ މިއަދު މަަޝްވަރާކޮށް ގޮތެއް ނިންމަން ޖެހޭކަމެއްގެ ގޮތުގައި މިނިސްޓަރު ފާހަގަ ކުރެއްވި އެވެ.

"އެކި ސެޓިފިކޭޝަން އެބަދޭ ދެމެހެއްޓެނިވި މަސްވެރިކަމަށް. ހާއްސަކޮށް އެމްއެސްއީ ސެންޓފިކޭޝަން ދޭ. ނަމަވެސް އެހެން ގައުމުތަކަށް މިފަދަ [ދެމެހެއްޓެނިވި] މަސްވެރިކަމެއް ނުކުރެވޭތީ މިހާރު ފެންނަނީ ލޮބީ ގްރޫޕްތަކުން ދެމެހެއްޓެނި ނޫން އެހެން ބާވަތްތަކުގެ މަސްވެރިކަމަށް ވެސް އެމްއެސްއީ ސެޓިފިކޭޝަން ހޯދައި ދޭތަން. އެހެންވެ މިހާރު ދުނިޔޭގެ ބާޒާރުގައި ވާދަވެރިކަން އޮތް ގޮތުން ޕްރިމިއަމް އަގެއް ނުލިބޭ،" ޝިޔާމް ވިދާޅުވި އެވެ. 

މިނިސްޓަރު ވިދާޅުވީ މޫސުމީ ބަދަލުތަކާއެކު ކަނޑުގެ މަތީ ފަށަލައިން ކުރާ މަސްވެރިކަން ދަށްވާކަން ތަފާސް ހިސާބުތަކުން ފެންނަ ކަމަށާ ސަރުކާރުން "ލޯންގް ލޭން" އަށް ދާ އުޅުނީ ވެސް އެހެންވެ އެވެ. ނަމަވެސް މަސްވެރިންގެ އެދުމަށް އެކަން މަޑު ޖައްސަލާފައިވާކަމަށް ވިދާޅުވި އެވެ.