ޑޮކިއުމެންޓްރީ މައްސަލައިގައި އީޝާގެ މައްޗަށް ގަޒްފުގެ ދައުވާކޮށްފި
އެ ޑޮކިއުމެންޓްރީގައި ކާކުކަން ނޭންގޭ ގޮތަށް އަޑު ބަދަލުކޮށްގެން މައުލޫމާތު ދިން ކަމަށް ތުހުމަތުކުރަނީ އީޝާގެ މައްޗަށެވެ.
އަދަދު ނޫހުގެ "އައިޝާ" ނަމަކަށް ކިޔާ ޑޮކިއުމެންޓްރީއަކަށް މައުލޫމާތު ދިން ކަމަށް ތުހުމަތުކޮށް، ރައީސް އޮފީހުގެ ކުރީގެ މުވައްޒަފު އީޝާ އަޝްރަފްގެ މައްޗަށް ގަޒްފުގެ ދައުވާ އުފުލައިފި އެވެ.
"އަދަދު" ނޫހުން މިދިޔަ މާޗު 28 ވަނަ ދުވަހު ނެރުނު "އައިޝާ" ނަމަކަށް ކިޔާ އެ ޑޮކިއުމެންޓްރީއަކީ ރައީސް ޑރ. މުހައްމަދު މުއިއްޒުގެ މައްޗަށް ގަޒުފްކޮށް ހަދާފައިވާ ކަމަށް ބުނާ ޑޮކިއުމެންޓްރީއެކެވެ. އެ ޑޮކިއުމެންޓްރީގައި ކާކުކަން ނޭންގޭ ގޮތަށް އަޑު ބަދަލުކޮށްގެން މައުލޫމާތު ދިން ކަމަށް ތުހުމަތުކުރަނީ އީޝާގެ މައްޗަށެވެ.
އެ މައްސަލައިގައި އީޝާ ފުލުހަށް ހާޒިރުކޮށް ބަޔާން ނަގާފައިވެ އެވެ. އަދި އޭނާގެ ޕާސްޕޯޓް ވެސް ވަނީ ހިފަހައްޓާފަ އެވެ.
އީޝާގެ މައްޗަށް ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓުގައި ގަޒްފުގެ ދައުވާ އުފުލިކަން ކަށަވަރުވި ނަމަވެސް އެ ދައުވާގެ ތަފްސީލު ހާމަކޮށްފައެއް ނުވެ އެވެ.
އެ ޑޮކިއުމެންޓްރީގެ މައްސަލައިގައި "އަދަދު" ނޫހުގެ ސީއީއޯ ހުސައިން ފިޔާޒް މޫސާ އާއި އެނޫހުގެ އެޑިޓަރު ހަސަން މުހައްމަދުގެ މައްޗަށް ވެސް ވަނީ ގަޒްފުގެ ދައުވާ އުފުލާފަ އެވެ. އެ މައްސަލައިގެ ޝަރީއަތް ކުރިއަށް ގެންދަނީ ސިއްރުކޮށްގެންނެވެ.
ކޮމެންޓް
Republic of Maldives