ސާވިސް ޗާޖު ޑޮލަރުން ދިނުން ލާޒިމްކުރާ ބިލު އަވަސްކުރަން އެދިއްޖެ
އެ ބިލު މަޖިލީހަށް ހުށަހެޅި ޑިސެމްބަރު 8، 2025 ގަ އެވެ. މަޖިލީހުން އެ ބިލަށް ބަހުސް ކުރުމަށް ފަހު ކޮމިޓީ އަށް ފޮނުވަން ފާސް ކުރި އެވެ. އޭގެ ފަހުން އެ ބިލުގެ މަސައްކަތެއް ނުހިނގަ އެވެ.
ރިސޯޓުތަކުގައި މަސައްކަތް ކުރާ މުވައްޒަފުންނަށް ދޭން ޖެހޭ ސާވިސް ޗާޖު ޑޮލަރުން ދިނުމަށް ލާޒިމް ކުރަން ވަޒީފާ އާ ބެހޭ ގާނޫނަށް ހުށަހެޅި އިސްލާހުގެ މަސައްކަތް އަވަހަށް ނިންމައި ދިނުމަށް އެދިއްޖެ އެވެ.
ވަޒީފާ އާ ބެހޭ ގާނޫނުގައި ބުނާ ގޮތުން ޓޫރިޒަމް ސިނާއަތުގައި ހިންގާ ވިޔަފާރިތަކުން ފޯރުކޮށްދޭ ކޮންމެ ހިދުމަތަކުން 10 ޕަސެންޓަށް ވުރެ މަދު ނޫން އަދަދަކުން ސާވިސް ޗާޖު ނަގައި އެ ފައިސާ ހުރިހާ މުވައްޒަފުންގެ މެދުގައި ހަމަހަމަ ކަމާއެކު ބަހަން ވާނެ އެވެ.
ނަމަވެސް ސާވިސް ޗާޖުގެ ގޮތުގައި ޑޮލަރުން ލިބޭ ފައިސާ ބައެއް ރިސޯޓުތަކުން މުވައްޒަފުންނަށް ދެނީ ރުފިޔާ އިންނެވެ.
އެ މައްސަލާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ރައްޔިތުންގެ މަޖިލީހަށް މިއަދު ފޮނުވި ސިޓީއެއްގައި ވިދާޅުވީ ޓޫރިޒަމް ސިނާއަތުގައި މަސައްކަތް ކުރާ އެތައް މުވައްޒަފުންނަށް ލިބެން ޖެހޭ ސާވިސް ޗާޖު ހައްގު ފުރިހަމަ ގޮތުގައި ލިބުމަށް ހުރަސް އެޅޭ ގޮތަށް އަމަލު ކުރަމުންދާ ކަމުގެ ކަންބޮޑުވުން އެ ފަރާތްތަކުން ފާޅު ކުރާ ކަމަށެވެ.
އެހެންވެ އެ މައްސަލަ ހައްލު ކުރުމަށް ވަޒީފާ އާ ބެހޭ ގާނޫނަށް ކެންދޫ ދާއިރާގެ މެންބަރު މައުރޫފް ޒާކިރު ހުށަހަޅާފައިވާ ބިލު ވީއެންމެ އަވަހަށް ނިންމައި ދިނުމަށް އެދޭ ކަމަށް ކުޑޫ ވިދާޅުވި އެވެ.
މައުރޫފް ހުށަހެޅި އިސްލާހުގައި ބުނެފައި ވަނީ ސާވިސް ޗާޖުގެ ގޮތުގައި ނަގާ ފައިސާ ދިވެހި ރުފިޔާ އަށް މާރު ނުކުރެވޭނެ ކަމަށާއި މުވައްޒަފުންނަށް ސާވިސް ޗާޖު ދޭން ވާނީ އެ ފައިސާ ލިބުނު ކަރަންސީއަކުން ކަމަށެވެ.
އޭނާ އެ ބިލު މަޖިލީހަށް ހުށަހެޅި ޑިސެމްބަރު 8، 2025 ގަ އެވެ. ޕީއެންސީގެ މެޖޯރިޓީ އޮތް މަޖިލީހުން އެ ބިލަށް ބަހުސް ކުރުމަށް ފަހު ކޮމިޓީ އަށް ފޮނުވަން ފާސް ކުރި އެވެ. ނަމަވެސް އޭގެ ފަހުން އެ ބިލުގެ މަސައްކަތެއް ނުހިނގަ އެވެ.
ކޮމެންޓް
Republic of Maldives