ހޮޓެލް އޭޝިއާގައި އެސްޓީއޯ | ގިނަ ޕްރޮމޯޝަނަލް ހަރަކާތްތަކެއް

މި އަހަރުގެ ހޮޓެލް އޭޝިއާ އެގްޒިބިޝަންގައި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ބައިވެރިވާން ނިންމައިފި އެވެ.

އެސްޓީއޯ އިން ބުނީ މާދަމާ ފަށާ މި އެގްޒިބިޝަންގައި އެ ކުންފުނީގެ ސްޓޯލް މިފަހަރު ހާއްސަ ކޮށްފައި ވަނީ އެސްޓީއޯ ޖެނެރަލް ޓްރޭޑިންނާއި އެސްޓީއޯ ޕީޕަލްސް ޗޮއިސް އަދި އެސްޓީއޯ އެނާޖީއަށް ކަމަށެވެ. 

އެ ސްޓޯލްގައި އެސްޓީއޯ ސުޕާމާކެޓުން ލިބޭ ބައެއް ޕްރޮޑަކްޓުތައް ބޭނުންކޮށްގެން ތައްޔާރުކުރެވޭ ލުއި ކާނާ ވަގުތުން ތައްޔާރުކުރާ ސްޓޭޝަނެއް ހުންނާނެ ކަމަށާއި އެގްޒިބިޝަން ކުރިއަށްދާ ތިން ދުވަހު ވެސް ކޮފީސްޓޭޓްގެ ވަކި ބުއިންތަކެއް ހިލޭ ލިބޭނެ ކަމަށް އެސްޓީއޯ އިން ބުންޏެވެ. 

އެސްޓީއޯއިން ގެންނަ ބައެއް ޕްރޮޑަކްޓްތަކާބެހޭ މައުލޫމާތު ސްޓޯލިން ފޯރުކޮށްދިނުމުގެ އިތުރުން އާ ބްރޭންޑެއް ވެސް އެސްޓީއޯއިން ތައާރަފް ކުރާނެ ކަމަށް އެ ކުންފުނިން ބުންޏެވެ. އެ ބްރޭންޑް ތައާރަފް ކުރާނީ މި އެގްޒިބިޝަންގެ ދެވަނަ ދުވަހުގައި ކަމަށާއި އެ ޕްރޮޑަކްޓް ބޭނުން ކޮށްގެން ތައްޔާރުކުރާ އައިސްކްރީމް އާއި ފޮނިކާތަކެތި ރަހަ ބެލުމުގެ ފުރުސަތު ވެސް ލިބޭނެ ކަމަށް އެސްޓީއޯ އިން ބުންޏެވެ.

އެސްޓީއޯ އެނާޖީގެ ފަރާތުން މިއަހަރު ރިސޯޓު ކަސްޓަމަރުންނަށް ހާއްސަކޮށް ތެޔޮ އުފުލައިދިނުމުގައި އެ ކުންފުނިން ފޯރުކޮށްދޭ ހިދުމަތްތަކުގެ މައުލޫމާތު ދިނުމާއި މި މާކެޓުގައި ކަސްޓަމަރުންގެ ޑިމާންޑުތަށް ހުރިނެތް ގޮތް ބަލާނެ ކަމަށް އެސްޓީއޯ އިން ބުންޏެވެ.

މީގެ އިތުރުން ސްޓޯލަށް ޒިޔާރަތް ކުރައްވާ ފަރާތްތަކަށް ހާއްސަކޮށްގެން ޕޮރޮމޯޝަނަލް ހަރަކާތްތަކުގެ ގޮތުގައި ރެޖިސްޓާ އެންޑް ވިން ގެ ނަމުގައި ހަރަކާތެއް ކުރިއަށް ދާނެ ކަމަށް ވެސް އެސްޓީއޯ އިން ބުންޏެވެ. އެ ހަރަކާތް ކުރިއަށްދާނީ ސްޓޯލްގައި ރަޖިސްޓްރީކުރައްވާ ފަރާތްތަކުގައި މެދުގައި ކަމަށާއި ކޮންމެ ދުވަހަކުވެސް މި ފަރާތްތަކުގެ ތެރެއިން ނަސީބުވެރި އެއްފަރާތް ގުރުއަތުން ހޮވާ އިނާމުދޭނެ ކަމަށް އެސްޓީއޯ އިން ބުންޏެވެ.

ފޮލޯއެންޑް ވިން ހަރަކާތުގައި އެސްޓީއޯ ޕީޕަލްސް ޗޮއިސް ޕޭޖް ފޮލޯކުރައްވައިގެން ނަސީބުވެރި ފަރާތަކަށް ޑިޝްވޮޝާ އެއްލިބުމުގެ ފުރުސަތު ފަހިވެގެންދާނެ ކަމަށް ވެސް އެސްޓީއޯ އިން ބުންޏެވެ.

ހޮޓެލް އޭޝިއާ 2026 ކުރިއަށް ދާނީ މާދަމާއިން ފެށިގެން މި މަހުގެ 30 އަށް ހުޅުމާލޭ ސިންތެޓިކް ޓްރެކްގަ އެވެ.