ޕާކުކޮށްފައި ހުރި ސައިކަލެއްގެ މަޑި ދަށުން 150،000ރ. ވަގަށް ނަގައިފި

މާލެ ފަތާ ޓްރެކް ކައިރީގައި ޕާކުކޮށްފައި ހުރި ސައިކަލެއްގެ މަޑި ދަށުން 150،000 ރުފިޔާ ވަގަށް ނެގި މައްސަލައެއް ފުލުހުން ބަލަން ފަށައިފި އެވެ. 

މިދިޔަ ބުދަ ދުވަހުގެ ރޭ ފުލުހުންނަށް ހުށަހެޅި މި މައްސަލައިގެ ތަހުގީގުގެ ތެރެއިން، އެ ސަރަހައްދުގެ ސީސީޓީވީ ފުޓޭޖް ބަލައި، ސައިކަލު މަޑިދަށުން ފައިސާ ވަގަށްނެގި ކަމަށް ތުހުމަތުކުރެވޭ ވަނީ ހޯދައިފަ އެވެ.

ފުލުހުން ބުނީ އެ މީހާ ފުލުހަށް ހާޒިރުކޮށް ސުވާލުކުރުމުން، ފައިސާ ނެގިކަމަށް އޭނާ އިއުތިރާފުވެފައިވާ އެވެ.

ފުލުހުން ބުނީ ވަގަށް ނެގި ފައިސާގެ ތެރެއިން، އޭނާގެ އެކައުންޓަށް ޖަމާކޮށްފައި ހުރި 55،000 ރުފިޔާ ފުލުހުންނާ ހަވާލުކޮށްފައިވާ ކަމަށެވެ. އަދި 40،000 ރުފިޔާ، ފައިސާގެ ވެރިފަރާތުގެ އެކައުންޓަށް ޖަމާކޮށްދީފައިވާ ކަމަށެވެ. 

ވާކީ ހުރި 55،000 ރުފިޔާ، ތުހުމަތުކުރެވޭ ފަރާތުން ބޭނުންކޮށްފައިވާތީ އެ ފައިސާ ހޯދުމުގެ މަސައްކަތް ތަހުގީގުގެ ތެރެއިން ކުރަމުންދާ ކަމަށް ވެސް ފުލުހުން ބުންޏެވެ. ނަމަވެސް މި މައްސަލައާ ގުޅިގެން މީހަކު ހައްޔަރު ކޮށްފައެއް ނުވެ އެވެ.

ފައިސާ އާއި އަގުބޮޑެތި ސާމާނު ސައިކަލުގެ މަޑި ދަށުގައި ނުބެހެއްޓުމަށް މީގެ ކުރިން އެތައް ފަހަރެއްގެ މަތިން ފުލުހުން ވަނީ އާންމުންނަށް އިލްތިމާސްކޮށްފަ އެވެ.