ލޯންލީ ޕްލެނެޓްގެ 2027 ގެ އެންމެ ރީތި ބީޗްތަކުގެ ލިސްޓުގައި ފުލިދޫ

ދުނިޔޭގެ ޓޫރިޒަމް ސިނާއަތުގެ މަޝްހޫރު މަޖައްލާ "ލޯންލީ ޕްލެނެޓް" އިން ނެރުނު "ބެސްޓް އިން ޓްރެވަލް 2027" ލިސްޓުގައި ދުނިޔޭގެ އެކި ކަންކޮޅުތަކުން 25 މަންޒިލެއް ހިމެނުނުރު މި ލިސްޓުގައި ވ. ފުލިދޫ ބީޗް ހިމެނިއްޖެ އެވެ. 

މިއަހަރުގެ ލިސްޓުގައި އާންމުކޮށް މީހުން ޗުއްޓީ ހޭދަކުރަންދާ މަޝްހޫރު މަންޒިލްތަކުގެ ބަދަލުގައި ތަފާތު ތަޖުރިބާތައް ލިބޭ އާންމުކޮށް މީހުން ނުދާ ފަދަ އަތިރިމަތީގެ މަންޒިލްތަކަށް ވަނީ އިސްކަންދީފަ އެވެ. 

ލޯންލީ ޕްލެނެޓްގެ ސީނިއަ ވައިސް ޕްރެޒިޑެންޓް ނިތްޔާ ޗެމްބާސް ވިދާޅުވި ގޮތުގައި މި ލިސްޓުގެ ސަބަބުން އަތިރިމައްޗާއި ރަށްރަށުގައި ޗުއްޓީ ހޭދަކުރުމުގެ ހިޔާލު އިތުރަށް ފުޅާވެގެންދާނެ އެވެ. އޭގެ ތެރޭގައި އަލިފާން ފަރުބަދަތަކާއި، ފިނި މޫސުމުގެ މަންޒިލްތައް ވެސް ހިމެނެ އެވެ.

ރާއްޖޭގެ ރިސޯޓުތަކުގެ ބަދަލުގައި ލޯކަލް ޓޫރިޒަމްގެ ތަޖުރިބާ ހޯދުމަށް ފުލިދޫ އަކީ އެންމެ ފުރިހަމަ އެއް މަންޒިލްގެ ގޮތުގައި ލޯންލީ ޕްލެނެޓުން ވަނީ ސިފަކޮށްފަ އެވެ. ބޮޑެތި ޕްރައިވެޓް ރިސޯޓުތަކުގެ ބަދަލުގައި ގެސްޓްހައުސްތަކުގައި މަޑުކޮށްލައިގެން، ރަށުގެ ރައްޔިތުންނާއެކު އުޅެމުން ރާއްޖޭގެ ގުދުރަތީ ރީތިކަމާއި، ސާފު މޫދާއި ދޮންވެލި ތުނޑިތަކުގެ ހިތްގައިމުކަން ތަޖުރިބާކުރުމުގެ ފުރުސަތު ފުލިދޫން ލިބޭނެކަން އެ މަޖައްލާ އިން ފާހަގަކޮށްފައިވެ އެވެ.

މި 25 މަންޒިލްގެ ލިސްޓަކީ ލޯންލީ ޕްލެނެޓްގެ ލިޔުންތެރިންނާއި ކޮންޓްރިބިއުޓަރުން ދުނިޔޭގެ އެކި ކަންކޮޅުތަކަށް ދަތުރުކޮށް، އެމީހުންގެ އަމިއްލަ ތަޖުރިބާގެ މައްޗަށް ބިނާކޮށް އެކުލަވާލާފައިވާ ލިސްޓެކެވެ. މީގެ ތެރޭގައި އުތުރު އެމެރިކާ، ޔޫރަޕް، ކެރީބިއަން، އެފްރިކާ، އޭޝިއާ އަދި އޯޝޭނިއާގެ މަންޒިލްތައް ހިމެނެއެވެ.