ނަތަންޔާހޫ ހުންނަ ހޮޓަލުގެ ނަރުދަމާ ވަޅުގަނޑެއްގެ ތެރެއިން ތިން މީހަކު ނުކުމެއްޖެ

އދ. ގެ އާންމު މަޖިލީހުގައި ބައިވެރިވުމަށް ގޮސް އުޅޭ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހުންނަވާ ކަމަށް ބެލެވޭ ނިއުޔޯކުގެ ހޮޓަލާ ކައިރިން މަގުމަތީގައި ހުރި ނަރުދަމާ ވަޅުގަނޑެއްގެ ތެރެއިން ގޮތްނޭނގޭ ތިން މީހަކު ނުކުމެގެން ދިޔަ މަންޒަރެއް ފެނިއްޖެ އެވެ.

ފުލުހުންނާ ހަވާލާދީ ނޫސްތަކުގައި ރިޕޯޓުކޮށްފައިވާ ގޮތުގައި ކާކުކަން ނޭނގޭ މި 3 މީހުން ނުކުމެފައިވަނީ ފަތިހު 4:35 ހާއިރު އެވެ. މި މީހުން ވަނީ އެތަނުން ނުކުމެ ދެ ކާރެއްގައި ޕާކް އެވެނިއުގެ އުތުރަށް ދުއްވާފަ އެވެ.

ނިއުޔޯކް ޓައިމްސްގައިވާ ގޮތުގައި ނަތަންޔާހޫ އަދި އެހެނިހެން އިސް ވެރިން ތިއްބަވާނީ މި ސަރަހައްދުގައި ހުންނަ 'ލޯވްސް ރީޖެންސީ ނިއުޔޯކް' ހޮޓަލުގައެވެ. މި ހާދިސާއަކީ ނަތަންޔާހޫގެ ދަތުރުފުޅާ ގުޅުންހުރި ކަމެއްކަން އަދި ކަށަވަރުނުވި ނަމަވެސް، ނިއުޔޯކް ފުލުހުން (އެންވައިޕީޑީ) އިން ވަނީ އެ ސަރަހައްދުގެ ސަލާމަތީ ކަންކަން ވަރުގަދަކޮށްފައެވެ.

ފުލުހުން ނެރުނު ބަޔާނެއްގައި ބުނެފައިވަނީ، ތޫފާނަކަށްފަހު، އަގުހުރި ތަކެއްޗާއި ދަގަނޑު ފަދަ ތަކެތި ހޯދުމަށް ނަރުދަމާ ނިޒާމުގެ ތެރެއަށް މީހުން ވަނުމަކީ މި ފަހަކަށް އައިސް އާންމުކޮށް ހިނގާ ކަމެއް ކަމަށެވެ. 

"މި ހާދިސާވެސް ފެންނަނީ އެފަދަ ކަމެއްގެ ގޮތުގައި. ނަމަވެސް އދ. ގެ އާންމު މަޖިލީސް ކުރިއަށްދާ ވަގުތާ ދިމާވުމުންނާއި، އެ ސަރަހައްދުގެ ނާޒުކުކަމަށް ބަލައި ފެޑެރަލް ފުލުހުންނާ ގުޅިގެން އިތުރު ސެކިއުރިޓީ ސްވީޕްތައް ދަނީ ކުރިއަށް ގެންދަމުން،" ފުލުހުން ބުނެފައިވެއެވެ.