ޑްރަގް ޓްރެފިކިންގައި އިސްކޮށް އުޅޭ ދެބެއިން ހައްޔަރަށް؛ ގެއިން ފެނުނީ 16 ގްރާމް

ތިނަދޫ ސިޓީގައި ހިންގި އޮޕަރޭޝަނެއްގައި މަސްތުވާތަކެތި ޓްރެފިކް ކުރުމުގައި އިސްކޮށް އުޅޭ ދެބައިން ހައްޔަރު ކޮށްފި އެވެ.

ފުލުހުން މިއަދު ބުނީ މި މަހު 21 ވަނަ ދުވަހު ތިނަދޫގައި ހިންގި މި އޮޕަރޭޝަނުގައި ގިނަ އަދަދަކަށް މަސްތުވާތަކެތި އެތެރެކޮށް ޓްރެފިކް ކުރާކަމުގެ ތުހުމަތުގައި ކޯޓު އަމުރެއްގެ ދަށުން އެ ސިޓިގެ ގެއެއް ބަލައިފާސްކޮށްފައިވާ ކަމަށެވެ.

އެ އޮޕަރޭޝަނުގައި އެ ގެއިން ފެނިފައި ވަނީ މަސްތުވާތަކެތި ކަަމަށް ބެލެވޭ 16.25 ގުރާމުގެ ތަކެއްޗެވެ.

މި މައްސަލައާ ގުޅިގެން ހައްޔަރުކޮށްފައިވަނީ ގދ. ތިނަދޫ، ހުދުރުވާގެ، ފަޒުލީން މުހައްމަދު (39އ) އާއި އެގޭ، އަޒުލިފު މުހައްމަދު (30އ) އެވެ. މި ދެ މީހުންނަކީ ވެސް މި ނެޓްވޯކްގައި އިސްކޮށް ހަރަކާތްތެރިވާކަމަށް ތުހުމަތުކުރެވޭ ދެ މީހުން ކަމަށް ފުލުހުން ބުންޏެވެ.

މި މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، ފަޒުލީން 70 ދުވަހަށް އަދި އަޒުލިފު 30 ދުވަހަށް ބަންދުކުރުމަށް ވަނީ އަމުރުކޮށްފަ އެވެ.

ފުލުހުން ބުނީ މި މައްސަލަ ތިނަދޫ ޕޮލިހާއި ސީރިއަސް ކްރައިމް އިންވެސްޓިގޭޝަން ގުޅިގެން ތަހުގީގު ކުރަމުންދާ ކަމަށެވެ.