އެއްފަހަރާ އެންމެ ގިނަ ބަޔަކު ސްނޯކަލް ކުރުމުގެ ވޯލްޑް ރެކޯޑް ބީއެމްއެލްއިން މުގުރާލައިފި

ބޭންކް އޮފް މޯލްޑިވްސް (ބީއެމްއެލް) އިން އެއްފަހަރާ އެންމެ ގިނަ ބަޔަކު ސްނޯކަލް ކުރުމުގެ ގިނިސް ވޯލްޑް ރެކޯޑް ހާސިލްކޮށްފި އެވެ. "ނިވާ ކުރުނބާ މޯލްޑިވްސް" ގައި ކުރިއަށްގެންދިޔަ މި ހަރަކާތުގައި ޖުމްލަ 314 މީހުން ވަނީ ބައިވެރިވެފައެވެ.

މި ރެކޯޑު ހެދުމުގެ މައިގަނޑު މަގްސަދަކީ ރާއްޖޭގެ ފަރުތަކުގެ ނާޒުކުކަމާއި ރީތިކަން އާންމުންނަށް އަމިއްލައަށް ތަޖުރިބާކުރުމުގެ ފުރުސަތުދީ ކަނޑުފަޅުގެ ދިރުންތައް ހިމާޔަތްކުރުމަށް އެންމެން ގުޅިގެން މަސައްކަތްކުރުމަށް ބާރުއެޅުމެވެ. ތިމާވެށި ހިމާޔަތްކުރުމުގެ މި މުހިންމު މަސައްކަތުގައި އާންމު ފަރުދުންނާއި މުޖުތަމައުގެ ބައިވެރިވުން އިތުރުކުރުމަށް ބީއެމްއެލްއިން ވަނީ މި ހަރަކާތް މެދުވެރިކޮށް އަމާޒު ހިފާފައެވެ.

މި ތާރީހީ ކާމިޔާބީ ހާސިލްކޮށްފައިވަނީ ބީއެމްއެލްގެ މުވައްޒަފުންނާއި ނިވާ ކުރުނބާ މޯލްޑިވްސްގެ ސްޓާފުންގެ އިތުރުން އެ ރިސޯޓުގައި ޗުއްޓީ ހޭދަކުރަމުންދިޔަ ފަތުރުވެރިންގެ ބައިވެރިވުމާއެކުގަ އެވެ. މި ހަރަކާތް ރަސްމީކޮށް ކަށަވަރުކުރުމަށްފަހު ގިނިސް ވޯލްޑް ރެކޯޑުގެ ސެޓްފިކެޓާ ހަވާލުވެވަޑައިގަތީ ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު އެވެ. އަދި 
މި ލިޔުން ހަވާލު ކޮށްދެއްވީ މޯޓަން ޖޫނިއާ ޖެނެރަލް މެނޭޖަރު އެވެ. 

މި ހަރަކާތަކީ ބީއެމްއެލްގެ "އެންވީ ޕީއޯއެސް" އިނިޝިއޭޓިވްގެ ދަށުން ކުރިއަށްގެންދިޔަ ހަރަކާތެކެވެ. އަދި ބީއެމްއެލް ޕީއޯއެސް ޓާމިނަލްތައް މެދުވެރިކޮށް ކުރާ ކޮންމެ މުއާމަލާތަކުން ބޭންކަށް ލިބޭ އާމްދަނީގެ ވަކި މިންވަރެއް ރާއްޖޭގެ ތިމާވެށީގެ ހަރަކާތްތަކަށް ފަންޑުކުރުމަށް ހޭދަކުރެ އެވެ. މިކަމަށްޓަކައި ކަސްޓަމަރުން ނުވަތަ ވިޔަފާރިވެރިންގެ އަތުން އިތުރު ފައިސާއެއް ނުކެނޑޭނެއެވެ.
މި ފަންޑުގެ ދަށުން ޕާލޭ މޯލްޑިވްސް އަދި މޯލްޑިވްސް އޯޝަން ޕްލާސްޓިކްސް އެލަޔަންސް ފަދަ ޖަމިއްޔާތަކާ ގުޅިގެން ކަނޑަށް އެޅޭ ޕްލާސްޓިކް ނަގައި، ރީސައިކަލްކޮށް ރާއްޖެއިން ބޭރަށް ފޮނުވުމަށް އެހީތެރިވެދެ އެވެ.