ބުކްލެޓުގެ ސްޓޮކް ލިބުން ލަސްވާތީ، ޕާސްޕޯޓުގެ މުއްދަތު އިތުރުކޮށްދެނީ

ޕާސްޕޯޓު ބުކްލެޓް ލިބުމުގައި ދަތިތަކެއް ކުރިމަތިވުމާ ގުޅިގެން، މިހާރު ހުރި ސްޓޮކް މެނޭޖްކުރުމަށްޓަކައި ޕާސްޕޯޓު ދޫކުރުމުގެ އުސޫލަށް މުހިންމު ބަދަލުތަކެއް ގެނައުމަށް އިމިގްރޭޝަނުން ނިންމައިފި އެވެ.

އިމިގްރޭޝަނުން ކުރި އިއުލާނެއްގައި ބުނީ، 2016 ވަނަ އަހަރުން ފެށިގެން ރާއްޖެއަށް ޕާސްޕޯޓު ބުކްލެޓް ފޯރުކޮށްދެމުން އަންނަ ޖަރުމަނުގެ ކުންފުނީގެ ޕްރިންޓް ހައުސްގެ މެޝިންތަކަށް ދިމާވި ޓެކްނިކަލް މައްސަލައަކާ ގުޅިގެން ސްޓޮކް ފޯރުކޮށްދިނުން ވަނީ ލަސްވެފަ އެވެ.

މި މައްސަލަ މިހާރު ހައްލުކުރެވިފައި ވީނަމަވެސް، ލަފާކުރި ވަރަށް ވުރެ ގިނަ ދުވަސް ހޭދަވުމުގެ ސަބަބުން، ދެން ޕާސްޕޯޓު ސްޓޮކް ރާއްޖެއަށް ލިބޭނެ ކަމަށް ލަފާކުރެވެނީ އަންނަ ސެޕްޓެމްބަރު މަހުގެ ނިޔަލަށް ކަމަށް އިމިގްރޭޝަނުން ބުންޏެވެ.

އެހެންކަމުން، މިހާރު ހުރި ސްޓޮކް މެނޭޖުކުރުމަށްޓަކައި، މިއަދުން ފެށިގެން ޕާސްޕޯޓު ދޫކުރުމުގެ އުސޫލަށް ބަދަލުތަކެއް ގެނެސްފައިވާކަމަށް އިމިގްރޭޝަނުން ބުންޏެވެ.

ޕާސްޕޯޓު ދޫކުރުމުގެ އުސޫލަށް މިފަދަ ބަދަލުތަކެއް ގެނައި ނަމަވެސް، އެއްވެސް ދިވެހި ރައްޔިތަކަށް ރާއްޖެއިން ބޭރަށް ދަތުރުކުރުމުގައި އެއްވެސް ދަތިކަމެއް ނުވަތަ ހުރަހެއް ކުރިމަތިނުވާނެ ކަމުގެ ފުރިހަމަ ޔަގީންކަން އިމިގްރޭޝަނުން ވަނީ ދީފަ އެވެ. 

އަދި މި ބަދަލުތަކާ ގުޅިގެން ހިދުމަތް ހޯދާ ފަރާތްތަކަށް ދިމާވެދާނެ ދަތިތަކަށްޓަކައި އެ އިދާރާއިން ވަނީ މައާފަށް އެދިފަ އެވެ.