އެޗްޑީސީ ވިލުންތެރި ކަނބަލުން ޕްރޮގްރާމުން 175 އަންހެނުން ތަމްރީންކޮށްފި

އާންމުކޮށް ފިރިހެނުން ކުރާ މަސައްކަތްތައް ކަމަށް ބެލެވިފައި އޮންނަ، ގޭތެރޭގެ އެޕްލަޔަންސްތަކާއި ސައިކަލު މަރާމާތުކުރުން ފަދަ ހުނަރުތަކާއެކު ހުޅުމާލެ އިން 264 އަންހެނުން ތަމްރީނުކޮށް އެޗްޑީސީގެ "ވިލުންތެރި ކަނބަލުން" ޕްރޮގްރާމް ކާމިޔާބުކަމާއެކު ނިންމާލައިފި އެވެ.

ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް އިންސްޓިޓިއުޓް އޮފް ޓެކްނޮލޮޖީ (އެމްއައިޓީ) ގުޅިގެން ހުޅުމާލޭގައި ކުރިއަށްގެންދިޔަ މި ޕްރޮގްރާމް ނިންމުމުގެ ރަސްމިއްޔާތުގައި ވާހަކަދައްކަވަމުން އެޗްޑީސީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް (ރިޓަޔާޑް) ޢަލީ ޒުހައިރު ވިދާޅުވީ މިއީ ހަމައެކަނި އާދައިގެ ތަމްރީނެއް ނޫން ކަމަށެވެ. އަދި މިއީ ކޮންމެ ހާލަތަކަށް ވެސް ތައްޔާރުވެފައިވާ ވިލުންތެރި މުޖުތަމަޢުއެއް ހުޅުމާލޭގައި ބިނާކުރުމަށް 2023 ވަނަ އަހަރުން ފެށިގެން އެ ކުންފުނީގެ އިޖުތިމާޢީ ޒިންމާގެ ދަށުން ކުރަމުން އަންނަ މަސައްކަތަށް އިތުރުވި މުހިންމު ބޮޅެއްކަމަށް އޭނާ ފާހަގަކުރެއްވި އެވެ.

މި ޕްރޮގްރާމްގެ ސަބަބުން، ވަކި ޖިންސަކަށް ވަކި ބާވަތެއްގެ މަސައްކަތެއް ޚާއްސަވެފައި އޮންނަ އޮތުން ނުވަތަ މުޖުތަމަޢުގައި އޮންނަ ވިސްނުން މުގުރިގެންދާނެކަން ޒުހައިރު ފާހަގަކުރެއްވި އެވެ. އަދި މިއީ ތަފާތުކުރުންތައް ނައްތާލުމަށް އެޅުނު ވަރަށް މުހިންމު ފިޔަވަޅެއްކަމަށް ވެސް ވިދާޅުވި އެވެ. 

ޒުހައިރު ވިދާޅުވި ގޮތުގައި އެޗްޑީސީގެ އެންމެ ބޮޑު އެއް އަމާޒަކީ ހުޅުމާލެއަކީ ދިރިއުޅެން ފަސޭހަ، އަމާން އަދި އަންހެނުންނާއި ފިރިހެނުން ވެސް ބާރުވެރިކުރުވާ މާހައުލަކަށް ހެދުމެވެ. މިގޮތުން، މި ޕްރޮގްރާމުން ކަނބަލުންނަށް ލިބުނު ހުނަރުގެ ސަބަބުން ހުޅުމާލޭގެ ތަރައްޤީގައި އެކަނބަލުންގެ ހިއްސާ އިތުރުވެގެންދާނެކަމުގެ ޔަޤީންކަން އެބައޮތް ކަމަށް ވިދާޅުވި އެވެ.