ކުރިނބީން 100 އަހަރުގެ ލޭންޑްޔޫސް ޕްލޭން ރައީސާ ހިއްސާކޮށްފި
ހދ. ކުރިނބީގައި ވަށައިގެން 105 މީޓަރު އުސް، ބިޔަ ގަސްތަކެއް ހެދިފައި ވެއެވެ. އަދި ރަށުގެ ދެކުނު ފަރާތުގައި ބޮޑު ކަނޑޫފަލެއް އޮވެއެވެ. "ނާލުން" ނަމަކަށް ކިޔާ ކުޅިވަރަކީ ހަމައެކަނި ކުރިނބީގައި ކުޅޭ ކުޅިވަރެކެވެ. އެ ކުޅެ އުޅެނީ އީދުގަ އެވެ.
ހދ. ކުރިނބީގެ ތަރައްގީގެ މަޝްރޫއުތަކާއި އަދި ރައްޔިތުންނަށް ބޭނުންވެފައިވާ ކަންކަމުގެ މައުލޫމާތު ރައީސަށް ދެންނެވުމާއެކު ކުރިއަށް އޮތް 100 އަހަރަށް އަމާޒުކޮށް ކުރިނބީ ކައުންސިލުން އެކުލަވާލާފައިވާ ލޭންޑްޔޫސް ޕްލޭނެއްގެ ފުރިހަމަ މައުލޫމާތު ރައީސް އިބްރާހިމް މުހައްމަދު ސޯލިހާ ހިއްސާކޮށްފި އެވެ.
ރައީސް ސޯލިހު ހދ. ކުރިނބީ ކައުންސިލާއި އެރަށުގެ ޑަބްލިޔުޑީސީގެ މެންބަރުންނާ ބައްދަލު ކުރެއްވީ އިއްޔެ އެވެ. އެ ބައްދަލުވުމަކީ އެ ރަށުގެ ތަރައްގީއަށް ރައްޔިތުން ބޭނުންވާ ކަންކަމާއި ގުޅޭގޮތުން މަޝްވަރާ ކުރެއްވުމުގެ ބައްދަލުވުމެކެވެ.
އިއްޔެ މެންދުރުފަހު ރައީސް އޮފީހުގައި ކުރިނބީ ކައުންސިލާއި ޑަބްލިޔުޑީސީގެ މެމްބަރުން 100 އަހަރަށް ލޭންޑް ޔޫސް ޕްލޭނެއް ހުށަހެޅި ނަމަވެސް އޭގެ ތަފުސީލެއް ރައީސް އޮފީހުން ހާމައެއް ނުކުރެ އެވެ. އެކަމަކު އެ ބައްދަލުވުމުގައި ކުރިނބީ ކައުންސިލުން ފާހަގަ ކުރި ކަންކަމުގެ ތެރޭގައި ބަނދަރުގެ ދަތިކަމާއި ކައުންސިލް އިދާރާގެ ޖާގައިގެ ދަތިކަމާއި، ރަށުގެ ރައްޔިތުން މޫދަށް އެރޭނެ ތަނެއް ނެތުމުގެ ދަތިކަން ރައީސަށް ދެންނެވި ކަމަށް ރައީސް އޮފީހުން ބުންޏެވެ.
ކުރިނބީއަށް ރައީސް ދެއްވި ޖަވާބު
- ކުރިނބީން ފާހަގަ ކުރާ ގިނަ ކަންކަން ބަޖެޓުގައި ހިމެނިފައިވާނެ
- ކައުންސިލް އިދާރާ އާއި ބޯޅަ ދަނޑުގެ މަސައްކަތް ބައްލަވާނެ
- ބަނދަރު ބޮޑުކުރުމަށް ހޯދޭނެ ހައްލަކަށް މަޝްވަރާ ކުރައްވާނެ
ކުރިނބީ ކައުންސިލުން ފާހަގަކުރި ގިނަ ކަންކަން އަންނަ އަހަރުގެ ބަޖެޓުގައި ހިމެނިފައިވާކަން ފާހަގަކުރައްވާ ރައީސް ވިދާޅުވީ ކައުންސިލް އިދާރާގެ މަސައްކަތާއި ފުޓުބޯޅަ ދަނޑުގެ މަސައްކަތާއި ރަށުގެ ބަނދަރު ބޮޑުކުރުމަށް ރައްޔިތުން ބޭނުންވާތީ ހޯދޭނެ ހައްލަކާއި ގުޅޭ ގޮތުން ގުޅުންހުރި އިދާރާތަކާއި އެކު މަޝްވަރާކުރައްވާނެ ކަމަށެވެ. އަދި ރަށުގައި މޫދަށް އެރޭނެ ސަރަހައްދެއް ހެދުމުގެ މަސައްކަތް ބަނދަރުގެ މަސައްކަތް ކުރިޔަށްދާއިރު އެމަސައްކަތާއެކު ކުރިޔަށް ގެންދެވޭނެ ގޮތެއް ބައްލަވައި ދެއްވާނެ ކަމަށެވެ.
ކުރިނބީ ކައުންސިލުން ވަނީ، އެރަށުގެ ތަރައްގީއަށް މިހާތަނަށް އެންމެ ގިނަ މަސައްކަތްތައް ކޮށްދީފައި ވަނީ މިސަރުކާރުންކަން ފާހަގަކޮށްފަ އެވެ.
ހދ. ކުރިނބީ ކުރުކޮށް
- 1.ހދ. އަތޮޅު
- 2.ވައިކަރަދޫ ދާއިރާ
- 3.ޕޯސްޓް ކޯޑު: 02090
- 4.ބިމުގެ ބޮޑުމިން: 41.7 ހެކްޓަރު
- 5.އާބާދީ: 752
ކުރިނބީ ވަށައިގެން 105 މީޓަރު އުސް، ބިޔަ ގަސްތަކެއް ހެދިފައި ވެއެވެ. އަދި ރަށުގެ ދެކުނު ފަރާތުގައި ބޮޑު ކަނޑޫފަލެއް އޮވެއެވެ. "ނާލުން" ނަމަކަށް ކިޔާ ކުޅިވަރަކީ ހަމައެކަނި ކުރިނބީގައި ކުޅޭ ކުޅިވަރެކެވެ. ކުޅެ އުޅެނީ އީދުގަ އެވެ. ކުރިނބީއަކީ އަތޮޅުގެ މެދުގައި އޮންނަ އަތޮޅުގެ އެހެން ހުރިހާ ރަށެއް ފެންނަ ރަށެކެވެ. އެ ރަށުގައި "އީސާކަލޭގެފާނު" ކިޔާ ސަރަޙައްދެއް އޮވެއެވެ. އެތަނުގައި ޒަމާންވީ އިމާރާތެއްގެ ބިންގަލެއް ހުރެއެވެ
ކޮމެންޓް
Republic of Maldives