މަޖިލިސް މެމްބަރުންގެ ސުވާލުތައް ގިނަވެ، އެޖެންޑާކުރުން ލަސްވުމުގެ ޒިންމާ ނަގާކަށް ނުޖެހޭ: މުއްތަލިބު
"އަޅުގަނޑު ހަމަ ދަންނަވައިލަން ބޭނުންވަނީ ތިޔަ ބޭފުޅުން ހުށަހަޅުއްވާ ސުވާލުތަކުގެ އަދަދު ގިނަވުމުގެ ސަބަބުން، މަޖިލީހުގެ އެޖެންޑާގައި ކިޔޫ ތަރުތީބުން ސުވާލުތައް ހިމެނުން ލަސްވުމަކީ އަޅުގަނޑު އެކަމުގެ ޒިންމާ އުފުލަންޖެހޭނެ ކަމެއް ނޫން."
ރައްޔިތުންގެ މަޖިލީހަށް މެންބަރުން ހުށަހަޅުއްވާ ސުވާލުތައް ގިނަވުމުގެ ސަބަބުން، އެ ސުވާލުތައް އެޖެންޑާކުރުން ލަސްވުމަކީ އޭނާ ޒިންމާ ނަގަންޖެހޭ ކަމެއް ނޫން ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މައުރޫފް ޒާކިރު ވަނީ ބ. ކިހާދޫގެ ފެނާއި ނަރުދަމާގެ މަސައްކަތް ފެށުން ލަސްވާ ސަބަބާ ގުޅޭގޮތުން ވަޒީރާ ސުވާލު ކުރައްވައިފަ އެވެ.
މެންބަރު ފާހަގަކުރެއްވި ގޮތުގައި އެ ސުވާލު މަޖިލީހުގެ އިދާރާއަށް ހުށަހަޅުއްވާފައިވަނީ މިދިޔަ އަހަރުގެ ސެޕްޓެންބަރު މަހުގެ 8 ވަނަ ދުވަހު އެވެ.
އެކަމާ ގުޅިގެން މުއްތަލިބު ވިދާޅުވީ އެއީ އޭނާ ޒިންމާ ނަންގަވަން ޖެހިވަޑައިގަންނަވާ ކަމެއް ނޫން ކަމަށެވެ.
"އަޅުގަނޑު ހަމަ ދަންނަވައިލަން ބޭނުންވަނީ ތިޔަ ބޭފުޅުން ހުށަހަޅުއްވާ ސުވާލުތަކުގެ އަދަދު ގިނަވުމުގެ ސަބަބުން، މަޖިލީހުގެ އެޖެންޑާގައި ކިޔޫ ތަރުތީބުން ސުވާލުތައް ހިމެނުން ލަސްވުމަކީ އަޅުގަނޑު އެކަމުގެ ޒިންމާ އުފުލަންޖެހޭނެ ކަމެއް ނޫން،" އޭނާ ވިދާޅުވި އެވެ.
އިދިކޮޅު އެމްޑީޕީގެ މެންބަރުން ސަރުކާރުގެ ވަޒީރުންނާ ކުރައްވާ ސުވާލުތަކުގެ ތެރެއިން އެންމެ ބޮޑު ނިސްބަތެއް އަމާޒުވެފައިވަނީ ހައުސިން މިނިސްޓަރު މުއްތަލިބަށެވެ.
ކޮމެންޓް
Republic of Maldives