ސައީދުގެ އިތުބާރު ނެތް މައްސަލައެއް އިދިކޮޅުން މަޖިލީހަށް ވައްދައިފި
ސައީދުގެ އިތުބާރު ނެތް ކަމުގެ ވޯޓު ނެގުމުގެ މައްސަލާގައި ސޮއި ކޮށްފައި ވަނީ އެމްޑީޕީގެ 13 މެންބަރުންނެވެ. އެ މައްސަލަ ފާސް ކުރަން މަޖިލީހުގެ އަގުލަބިއްޔަތު ބޭނުން ވާނެ އެވެ.
އިކޮނޮމިކް މިނިސްޓަރު މުހައްމަދު ސައީދުގެ އިތުބާރު ނެތް މައްސަލައެއް އިދިކޮޅު އެމްޑީޕީން ރައްޔިތުންގެ މަޖިލީހަށް ހުށަހަޅައިފި އެވެ.
ސައީދުގެ އިތުބާރު ނެތް ކަމުގެ ވޯޓު ނެގުމުގެ މައްސަލާގައި ސޮއި ކޮށްފައި ވަނީ އެމްޑީޕީގެ 13 މެންބަރުންނެވެ. އެ މައްސަލަ ފާސް ކުރަން މަޖިލީހުގެ އަގުލަބިއްޔަތު ބޭނުން ވާނެ އެވެ.
އެމްޑީޕީން ހުށަހެޅި ގަރާރުގައިވާ ގޮތުން ސައީދު ވަނީ މިނިސްޓަރެއްގެ މަސްއޫލިއްޔަތު އަދާ ކުރުމުގައި ސައީދު ގާނޫނުއަސާސީ އާ ހިލާފުވެފަ އެވެ. އަދި މަޖިލީހަށް ޖަވާބުދާރީވުމުގައި ވެސް އިހުމާލުވެފައިވާތީ އޭނާގެ މައްޗަށް އިތުބާރު ގެއްލިފައިވާ ކަމަށް އެ މައްސަލަގައި ބުނެފައިވެ އެވެ.
ސައީދަށް ތުހުމަތު ކުރައްވާ މައިގަނޑު ހަ މައްސަލައެއް އެ ގަރާރުގައި ވަނީ ފާހަގަ ކޮށްފަ އެވެ.
ސައީދުގެ އިތުބާރު ނެތް ކަމަށް ހުށަހަޅާ ސަބަބުތައް
- 1.ޑޮލަރުގެ އަގު ކަޅުބާޒާރުގައި ހުއްޓުމެއް ނެތި މައްޗަށް ގޮސް ތަކެތީގެ އަގު އިންތިހާ އަށް އުފުލުން.
- 2.ދައުލަތުގެ މުދަލާއި ފައިސާ އަމާނާތްތެރިކަމާއެކު ނުބެލެހެއްޓުން.
- 3.ރައްޔިތުންގެ މަޖިލީހަށް ޖަވާބުދާރީވުމަށް ހުރަސް އެޅުން.
- 4.ޕްރައިވެޓް ސެކްޓާ ހިމާޔަތް ކުރުމުގައި ފެއިލްވުން.
- 5.އެސްއީޒެޑް ގާނޫނަށް ގެނައި އިސްލާހާއި ދައުލަތުގެ ސިޔާދަތަށް ނުރައްކާވުން.
- 6.އިގްތިސާދީ މަލަމަތި ބަދަލު ކޮށްލާނެ ކަމަށް ބުނެ ސައީދު ތަފާތު ބިޔަ މަޝްރޫއުތަކެއް އިއުލާން ކުރެއްވި ނަމަވެސް މަޝްރޫއުތައް ހުއްޓިފައިވުން.
މަޖިލީހުން ފާސް ކުރާ ހިސާބުން މިނިސްޓަރެއްގެ މަގާމް ގެއްލޭނެ އެވެ.
ގާނޫނުއަސާސީގައި ބުނާ ގޮތުން މިނިސްޓަރެއްގެ އިތުބާރު ނެތް ކަމަށް ފާސް ވާނީ މަޖިލީހުގެ އަގުލަބިއްޔަތުންނެވެ. ނަމަވެސް މިވަގުތު މަޖިލީހުގައި އޮތީ ސަރުކާރު ހިންގާ ޕާޓީ، ޕީއެންސީގެ ސުޕަ މެޖޯރިޓީ އެވެ.
ކޮމެންޓް
Republic of Maldives