ލޭންޑިން ކްރާފްޓެއް އަޑިއަށް ގޮސް، ދެ މީހަކު ގެއްލިގެން ހޯދަނީ

ކ. ގާފަރު ކައިރިން ދަތުރުކުރި ލޭންޑިން ކްރާފްޓެއް އަޑިއަށް ގޮސް، ދެ މީހަކު ކަނޑަށް ގެއްލިގެން ހޯދަން ފަށައިފި އެވެ.

ފުލުހުން ބުނީ ކ. ތިލަފުށިން ފުރައިގެން ދަތުރުކުރި މި ލޭންޑިން ކްރާފްޓެއް ދިޔަވެ ކައިރިއަށް އަޑިއަށްދާ ކަމުގެ މައުލޫމާތު ލިބުނީ މިއަދު ހެނދުނު 08:48 އެހައިކަންހާއިރު ކަމަށެވެ.

މި ހާދިސާ ހިނގި ވަގުތު އެ އުޅަނދުގައި ޖުމްލަ 10 މީހުން ތިއްބެވެ. އޭގެ ތެރެއިން އަށް މީހަކު މިހާތަނަށް ފެނިފައިވާ ކަމަށް ވެސް ފުލުހުން ބުންޏެވެ.

"ގެއްލިފައިވާ ބާކީ ދެ މީހުން ހޯދުމުގެ މަސައްކަތް ކަމާބެހޭ ފަރާތްތަކުން މިހާރު ދަނީ ކުރަމުން،" ފުލުހުން ބުންޏެވެ.

މި ހާދިސާ ހިނގިއިރު، މިއަދަކީ ވަރަށް ބޮޑަށް މޫސުން ގޯސް ދުވަހެކެވެ. ވައި ގަދަވެފައި ކަނޑު ވެސް ވަރަށް ގަދަކަމުން މެޓް އޮފީހުން އޮތީ ބޮޑު ސަރަހައްދަކަށް ވައިޓް އެލާޓް ނެރެފަ އެވެ.