ރާއްޖޭގެ 13 ރަށެއްގައި 2100 ހައުސިން ޔުނިޓް އަޅާނެ ބަޔަކު ހޯދަނީ
މި މަޝްރޫޢަށް ބީލަން ހުށަހެޅުމުގެ ފުރުޞަތު ހުޅުވާލާފައިވަނީ ހަމައެކަނި 100 އިންސައްތަ ދިވެހިންގެ މިލްކުވެރިކަން އޮންނަ ކުންފުނިތަކަށެވެ.
ހައުސިން މިނިސްޓްރީން މި އިއުލާނުކޮށްފައިވަނީ ގްރޭޓާ މާލެ ސަރަހައްދުން ބޭރުގައި ބޯހިޔާވަހިކަމުގެ ފުރުސަތުތައް ފުޅާކުރުމަށް ސަރުކާރުން ކުރިއަށްގެންދާ "ނޭޝަނަލް އެފޯޑަބަލް ހޯމް އޯނާޝިޕް ޕްރޮގްރާމް" ގެ ދަށުން އެވެ. މި މަޝްރޫއުގެ ދަށުން މި ޕްލެޓުތައް އަޅާ އަމިއްލަ ކުންފުނިތަކަށް ހަވާލުކޮށްގެން ޕަބްލިކް-ޕްރައިވެޓް ޕާޓްނަރޝިޕް އުސޫލުން ކުރިއަށްގެންދާ މަޝްރޫޢެކެވެ.
މި މަޝްރޫޢުގެ ބޭނުމަކީ އަގުހެޔޮ ބޯހިޔާވަހިކަން ފޯރުކޮށްދިނުމާއި، ރޭވުންތެރިކަމާއެކު ރަށްތައް ތަރައްޤީކުރުމުގެ އިތުރުން ރާއްޖޭގެ އިމާރާތްކުރުމުގެ ދާއިރާގެ ޤާބިލުކަން އިތުރުކުރުމެވެ. މި މަޝްރޫޢަށް ބީލަން ހުށަހެޅުމުގެ ފުރުޞަތު ހުޅުވާލާފައިވަނީ ހަމައެކަނި 100 އިންސައްތަ ދިވެހިންގެ މިލްކުވެރިކަން އޮންނަ ކުންފުނިތަކަށެވެ.
ހައުސިން ޔުނިޓްތައް ތަރައްޤީ ކުރާ ރަށްތއް
- ހއ. ހޯރަފުށި: 100 ހައުސިންގ ޔުނިޓް
- ރ. އުނގޫފާރު: 100 ހައުސިންގ ޔުނިޓް
- ބ. ތުޅާދޫ: 50 ހައުސިންގ ޔުނިޓް
- ޅ. ނައިފަރު: 300 ހައުސިންގ ޔުނިޓް
- މ. މުލި: 100 ހައުސިންގ ޔުނިޓް
- ދ. މީދޫ: 100 ހައުސިންގ ޔުނިޓް
- ލ. ގަން: 200 ހައުސިންގ ޔުނިޓް
- ތިނަދޫ ސިޓީ: 300 ހައުސިންގ ޔުނިޓް
- ފުވައްމުލައް ސިޓީ: 300 ހައުސިންގ ޔުނިޓް
- އައްޑޫ ސިޓީ ހިތަދޫ: 300 ހައުސިންގ ޔުނިޓް
- އައްޑޫ ސިޓީ ފޭދޫ: 200 ހައުސިންގ ޔުނިޓް
- އައްޑޫ ސިޓީ މަރަދޫ ފޭދޫ: 25 ހައުސިންގ ޔުނިޓް
- އައްޑޫ ސިޓީ މަރަދޫ: 25 ހައުސިންގ ޔުނިޓް
މި މަޝްރޫޢުގެ ދަށުން ތަރައްޤީކުރާނީ 3 ކޮޓަރީގެ އެޕާޓްމަންޓްތަކެކެވެ. މި އިމާރާތްތަކުގައި ޕާކުކުރެވޭނެ އެކަށީގެންވާ ނިޒާމެއް ހުންނަންޖެހޭއިރު، އިމާރާތުގެ އެންމެ ތިރީ ފަންގިފިލާ ހާއްސަ ކުރަންޖެހޭނީ ވިޔަފާރީގެ ބޭނުންތަކަށެވެ.
ހައުސިން މިނިސްޓްރީން ބުނީ މި މަޝްރޫޢުތަކަށް ބޭނުންވާ ބިން ސަރުކާރުން ހިލޭ ފޯރުކޮށްދޭނެއެވެ. އަދި ބިން ޙަވާލުކުރާ ތާރީޚުން ފެށިގެން ގިނަވެގެން ދެ އަހަރު ދުވަހުގެ ތެރޭގައި މަސައްކަތް އެއްކޮށް ނިންމައި ޔުނިޓްތައް ޙަވާލުކުރަން ޖެހެ އެވެ.
މި މަސައްކަތަށް ހޮވޭ ޑިވެލޮޕަރުންނަކީ މާލީ ގޮތުން ދެމެހެއްޓެނިވި، ފެންވަރު ރަނގަޅު، އަދި ޤައުމީ ބޯހިޔާވަހިކަމުގެ ސިޔާސަތުތަކާ އެއްގޮތްވާ ގޮތުގެ މަތިން މަޝްރޫޢުތައް ހިންގުމުގެ ޤާބިލުކަންހުރި ފަރާތްތަކަކަށް ވާންޖެހޭނެކަމަށް ވުޒާރާއިން ބުނެފައިވެ އެވެ.
ކޮމެންޓް
Republic of Maldives