ބީއެމްއެލާއި އެމްއެމްސީ އެކުވެގެން ފައިނޭންޝަލް ޖާނަލިޒަމް ކިޔައިދީފި

މޯލްޑިވްސް މީޑިއާ ކައުންސިލް (އެމްއެމްސީ) އާއި ދިވެހި ބޭންކު، ބޭންކް އޮފް މޯލްޑިވްސް (ބީއެމްއެލް) ގުޅިގެން ފައިނޭންޝަލް ޖާނަލިޒަމް ވޯކްޝޮޕް މިއަދު ހިންގައިފި އެވެ.

މި ވޯކްޝޮޕް، ނޫސްވެރިން ހިމެނޭ ގޮތަށް މާލޭގައި މިއަދު ކުރިޔަށް ގެންދިޔައީ މެންހެޓަން ބިޒްނަސް ހޮޓެލްގަ އެވެ.

ފަސް ސެޝަނަކަށް ރާވާފައި އޮތް މި ވޯކްޝޮޕްގައި އިގްތިސޯދުގައި ބޭންކުތަކުން އަދާ ކުރާ ދައުރާއި، ލޯނު ދޫކުރުމުގައި ބޭންކުން ބަލާ މިންގަނޑުތަކާއި، ޑިޖިޓަލް ބޭންކިން ކުރިއަރަމުން އަންނަ ގޮތުގެ މި ޒަމާނުގެ މައުލޫމާތުތައް ހިއްސާ ކުރި އެވެ.

މީގެ އިތުރުން ފަހަކަށް އައިސް ރާއްޖޭގެ މީޑިއާގައި ވަރަށް ގިނައިން ރިޕޯޓް ކުރަމުން ގެންދާ މަނީ ލޯންޑަރިން އާއި ޓެރަޒިޒަމަށް ފައިނޭންސް ކުރުން ފަދަ ކަންކަން ހުއްޓުވުމަށް މާލީ އިދާރާތަކުން ކުރާ މަސައްކަތްތަކާއި، ފައިނޭންޝަނަލް އެނަލިސިސް އަދި ރިޕޯޓްތައް ބަލައި ރިޕޯޓް ކުރާނެ ގޮތުގެ މައުލޫމާތު ވެސް ދިނެވެ.

އޮޅުވާލައިގެން ފައިސާ ހޯދަމުންދާ ގޮތްތަކާއި އާންމުން އެކަމުން ރައްކާތެރިވުމަށް ކުރަންޖެހޭ މަސައްކަތްތައްވެސް ބުނެދިން އިރު އެފަދަ ހާލަތްތަކުގައި ބޭންކުން ކުރަމުންދާ މަސައްކަތްތަކަށް ވެސް ކިޔައި ދިނެވެ.

ފައިނޭންސަލް ޖާނަލިޒްމްގެ ވޯކްޝޮޕްތައް ނޫސްވެރިންނަށް ހިނގުމަކީ ރާއްޖޭގެ މީޑިއާއަށް މުހިންމުވެފައި އޮތް ދާއިރާއެކެވެ. އަދި އެއީ ނޫސްވެރިން ބިނާ ކުރުމުގައި އެމްއެމްސީން ފަހަކަށް އައިސް އިސްކަން ދިން ދާއިރާއެކެވެ.