ޕީއެންސީގެ އިންތިހާބުގައި 33،000 މީހުން ވޯޓުލި

ސަރުކާރުގެ ހިންގާ ޕީއެންސީގެ އެތެރޭގެ އިންތިހާބުގައި 33،000 މީހުން ވޯޓުލާފައިވާކަމަށް އެ ޕާޓީން ބުނެފި އެވެ. 

ޕީއެންސީގެ އެތެރޭގެ އިންތިހާބުގައި 2،500 އަށް ވުރެ ގިނަ ކެންޑިޑޭޓުން ވާދަކޮށްފައިވާއިރު، މާލެ އާއި ރަށްރަށުގައި ޖުމްލަ 119 ފޮއްޓަކަށް ވޯޓުލުން މިއަދު ކުރިއަށް ގެންގޮސްފައިވަނީ ހެނދުނު 9:00 އިން ހަވީރު 4:00 އަށެވެ. 

މިއަދުގެ އިންތިހާބާ ގުޅޭ މައުލޫމާތު ދެއްވަމުން، ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، މި އިންތިހާބުގައި 40،000 އެއްހާ ޕީއެންސީގެ މެމްބަރުންނަށް ވޯޓުލުމުގެ ހައްގު ލިބިފައިވާއިރު، އޭގެތެރެއިން 85 ޕަސެންޓު މީހުން ވޯޓުލާފައިވާ ކަމަށެވެ. 

"ވޯޓު ފޮށި ބަންދުކުރުމާ ހަމައަށް ވޯޓުލުމުގެ ހައްގު ލިބިގެންވާ މީހުންގެ 85 ޕަސެންޓު ގާތްގަނޑަކަށް މިވަނީ ވޯޓުލާފައި. އެއީ ގާތްނޑަކަށް 32،000 އާއި 33،000އާ ދެމެދުގެ އަދަދެއް. ފައިނަލް އަދަދު ދަންނަވާލަން އެނގޭނީ ވޯޓުގެ ނަތީޖާ ލިބުނީމަ،" އަބްދުއްރަހީމް ވިދާޅުވި އެވެ. 

ޕީއެންސީގެ ދާއިރާތަކަށް އިންތިހާބުކުރާނީ ދާއިރާ ރައީސާއި ދާއިރާގެ ނައިބު ރައީސާއި އަންހެނުންގެ ހަރަކާތުގެ ރައީސާއި ޒުވާނުން ހަރަކާތުގެ ރައީސް އަދި ސްޓިއަރިން ކޮމިޓީގެ ރައީސް އެވެ.

ޕީއެންސީގެ ކޮންގްރެސް ބާއްވަން ނިންމާފައި ވަނީ އަންނަ ސެޕްޓެމްބަރު މަހުގެ 15 އިން 18 އަށެވެ.