ރާއްޖޭގެ ދަރަނި ފޮތުގައި ދައްކާ 44 ލޯނެއް | މި އަހަރު ދެ ލޯނު ނެގި

ރާއްޖޭގެ އެންމެ ފުރަތަމަ ލޯނެއް ނެގި ކަމަށް ފިނޭންސް މިނިސްޓްރީގެ ހިސާބުތަކުން ދައްކަނީ 4، ޖޫން 1979 އެވެ. މި ލޯނެއް ނަގާފައިވަނީ އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑީއޭ) ގެ "ފަސްޓް ފިޝަރީޒް ޕްރޮޖެކްޓް" އަށެވެ. މި ލޯނުގެ ޖުމްލަ އަދަދަކީ ގާތްގަނޑަކަށް 2.48 މިލިއަން ޑޮލަރެވެ. އޭގެފަހުން މިއަދަދާ ހަމައަށް ދައްކަން ޖެހޭ ލޯނުގެ ޖުމްލަ 44 އަށް އަރާއިރު މި ސަރުކާރުން އަލަށް ދެ ލޯނެއް ނަގާފައިވާ ކަމަށް ދައްކައިފި އެވެ. 

ފިނޭންސް މިނިސްޓްރީގެ ލޯނު ހިސާބުތައް ދައްކާ ރާއްޖޭގެ ލޯނު ލިސްޓުގައި ޖުމްލަ 142 ލޯނެއް ހިމެނެ އެވެ. މީގެ 98 ލޯނެއް ވަނީ ދައްކާ ހަލާސްކޮށްފަ އެވެ. އަދި މި ވަގުތު ދައްކަން ޖެހޭ "އެކްޓިވް" 44 ލޯނެއް އެބަހުއްޓެވެ. މި ލޯނުގެ ޖުމްލަ އަދަދު 1.32 ބިލިއަން ޑޮލަރަށް އަރަ އެވެ. އަދި އެންމެ ގިނަ ލޯނު ނަގާފައިވަނީ ޑޮލަރުންނެވެ. އެގޮތުން 15 ލޯނެއް ޖުމްލަ 618 މިލިއަން ޑޮލަރުން ނަގާފައިވެ އެވެ. 


މި ހިސާބުތަކުން އެނގޭ ގޮތުން ރައީސް ޑރ. މުހައްމަދު މުއިއްޒުގެ ސަރުކާރުން މި އަހަރު ދެ ލޯނެއް ނެގި އެވެ. މި ލޯނުތަކުގެ ޖުމްލަ އަދަދު 80 މިލިއަން ޑޮލަރަށް އަރަ އެވެ. މި ލޯނުތައް ނަގާފައިވަނީ ބަނދަރު ހެދުމާއި މުހިންމު ހިދުމަތްތައް ދިނުމަށެވެ. 

ރާއްޖޭގެ ތާރީހުގައި އެންމެ ބޮޑު ލޯނެއް ނަގާފައިވަނީ 30، އެޕްރީލް 2021 ގަ އެވެ. އެއީ 500 މިލިއަން ޑޮލަރުގެ ސްކޫކް އެކެވެ. އަދި ވަކި މަޝްރޫއަކަށް ބަލާއިރު އެންމެ ބޮޑު ލޯނެއް ނަގާފައިވަނީ 18 މާޗް 2019ގައި ރައީސް އިބްރާހިމް މުހައްމަދު ސޯލިހުގެ ސަރުކާރުންނެވެ. އެއީ އިންޑިއާގެ ކުރެޑިޓް ލައިންއިން ނެގި 450.8 މިލިއަން އެމެރިކާ ޑޮލަރުގެ ލޯނެކެވެ. 

މި ހިސާބުތަކުން އެނގޭ ގޮތުން މާލީ ގޮތުން އެންމެ ބޮޑު އެހީތެރިކަމެއް ރާއްޖެއަށް ދީފައިވަނީ ޗައިނާ އެގްޒިމް ބޭންކުންނެވެ. އެ ބޭންކުން ޖުމްލަ 6 ލޯނު ނަގާފައިވާއިރު، އެއީ އެއާޕޯޓް ބޮޑުކުރުމަށް  ނެގި 373.8 މިލިއަން ޑޮލަރުގެ ލޯނަކާއި ސިނަމާލެ ބްރިޖަށް ޗައިނާއިން ދިން 455.6 މިލިއަން ޗައިނީޒް ޔުއާން، އަދި ހުޅުމާލޭގެ ބޯހިޔާވަހިކަމުގެ ބޮޑެތި މަޝްރޫއުތަކަަށް ދިން ލޯނުތަކެވެ. ޖުމްލަ ދެ ލޯނެއްގެ ދަށުން 850.8 މިލިއަން ޑޮލަރު ކުރެޑިޓް ލައިނަށް 450.8 މިލިއަން އަދި ތިލަމާލެ ބްރިޖް / ގްރޭޓާ މާލެ ކަނެކްޓިވިޓީ މަޝްރޫއަށް 400 މިލިއަން ޑޮލަރު ދޫކޮށްފައިވެ އެވެ. މީގެ އިތުރުން ތިންވަނައަށް އެންމެ ގިނައިން ލޯނު ދެނީ ސައޫދީ އަރަބިއްޔާއިންނެވެ. އެ ގައުމުން ޖުމްލަ 10 ލޯނެއްގެ ދަށުން 1.52 ބިލިއަން ސައުދީ ރިޔާލް ދޫކޮށްފައިވެއެވެ. މީގެ ތެރޭގައި އެއާޕޯޓް ތަރައްޤީކުރުމާއި ހުޅުމާލެ ތަރައްގީކުރުމުގެ މަޝްރޫއުތައް ހިމެނެ އެވެ. 

މި ލޯނުތަކާއެކު ރާއްޖޭގެ ދައުލަތުގެ ޖުމްލަ ދަރަނި، ދައުލަތުން ސީދާ ނަގާފައިވާ ދަރަންޏާއި ދައުލަތުން ގެރެންޓީ ދީފައިވާ ދަރަނި އެއްކޮށް ހުރީ 154.85 ބިލިއަން ދިވެހި ރުފިޔާގަ އެވެ. މިއީ ގާތްގަނޑަކަށް 10 ބިލިއަން އެމެރިކާ ޑޮލަރެވެ. މިއީ ރާއްޖޭގެ ޖުމްލަ އުފެއްދުންތެރިކަމުގެ ނިސްބަތުން، ބަލާނަމަ ގާތްގަނޑަކަށް 124.4% އެވެ. އަދި އެތެރޭގެ ދަރަނި ގާތްގަނޑަކަށް 91 ބިލިއަން ރުފިޔާ އެވެ. މިއީ ރާއްޖޭގެ ބޭންކުތަކާއި ޕެންޝަން ފަންޑު އަދި ސަރުކާރުގެ ޓީ-ބިލްތަކާއި ބޮންޑުތަކަށް ދައްކަންޖެހޭ ފައިސާ އެވެ. އަދި ބޭރުގެ ދަރަނި ހުރީ ގާތްގަނޑަކަށް 63 ބިލިއަން ރުފިޔާ 4.42 ބިލިއަން ޑޮލަރެވެ.