ދެ މީހަކު މަރާލި ލަންކާގެ ގާތިލު ރާއްޖެއިން ހިފަހައްޓައި ފުރުވާލައިފި
އޭނާ ވަނީ ގާނޫނީ ވަކީލަކާއި އެ ވަކީލުގެ އަނބިމީހާ ގަޔަށް ބަޑި ޖަހައި މަރާލާފައި
ސްރީ ލަންކާގައި ދެ މީހަކު މަރާލި މައްސަލާގައި ހޯދަމުންދިޔަ މީހަކު ރާއްޖެއިން އަތުލައިގަނެ ފުރުވާލައިފި އެވެ.
ލަންކާގެ ނޫސްތަކުން ބުނާ ގޮތުގައި އުމުރުން 23 އަހަރުގެ ލަންކާ މީހާ ވަނީ ގާނޫނީ ވަކީލަކާއި އޭނާގެ އަނބިމީހާ އަށް ބަޑިން ހަމަލާދީ މަރާލައިފަ އެވެ.
އޭނާ އަތުލައިގެންފައި ވަނީ މިދިޔަ ހުކުރު ދުވަހު ރާއްޖެ އައިސް ވެލާނާ އިންޓަނޭޝަނަލް އެއާޕޯޓުގެ އިމިގްރޭޝަން ކައުންޓަރާ ހިސާބުންނެވެ.
އެއަށް އިއްޔެ މެންދުރު ފަހުގެ ފްލައިޓުން އޭނާ ފޮނުވާލުމުން ލަންކާގެ ކްރިމިނަލް އިންވެސްޓިގޭޝަން ޑިޕާޓްމަންޓް (ސީއައިޑީ) އޮފިސަރުން ވަނީ އޭނާ ހައްޔަރުކޮށްފަ އެވެ.
ލަންކާގެ ނޫސްތަކުގައި ބުނެފައި ވަނީ އެ މީހާއަކީ މިދިޔަ ފެބްރުއަރީ މަހުން ފެށީގެން އެ ގައުމުގެ ތަލަންގަމާ ޕޮލިސް ޑިވިޝަންގެ ބާރުގެ ދަށުގައިވާ އަކުރެގޮޑާ ސަރަހައްދުގައި، ގާނޫނީ ވަކީލަކަށާއި އޭނާގެ އަންހެނުންނަށް ބަޑިން ހަމަލާދިން މައްސަލައަކާ ގުޅިގެން ހޯދަމުންދިޔަ މީހެކެވެ.
އޭނާ ހޯދަން އިންޓަޕޯލްގެ ރެޑްނޯޓިސް ވެސް ވަނީ ނެރެފަ އެވެ.
ކޮމެންޓް
Republic of Maldives