ރާއްޖޭގެ ޓޫރިސްޓް ބެޑް ކެޕޭސިޓީ 68،000 އަށްވުރެ މައްޗަށް

މުޅިރާއްޖޭގައި ހުރި ޓޫރިސްޓް ބެޑް ކެޕޭސިޓީ ނުވަތަ ޖުމްލަ އެނދުގެ އަދަދު 68،000 އަށްވުރެ އިތުރު ވެއްޖެ އެވެ. 

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން ރާއްޖޭގެ މިމަހުގެ އެއްވަނަ ދުވަހުގެ ނިޔަލަށް ބަލާބަމަ ރާއްޖޭގެ ޓޫރިސްޓުން ޖުމްލަ އެނދުގެ އަދަދު ވަނީ 68,854 އަށް އަރާފައެވެ. އަދި މީގެތެރެއިން %98.6 އެނދު މިހާރު ހުރީ އޮޕަރޭޝަނުގަ އެވެ. 

ތަފާސްހިސާބުތަކުން ދައްކާގޮތުގައި ރާއްޖޭގައި ޓޫރިސްޓުންނަށް ހިދުމަތްދޭ ޖުމްލަ 1,303 ފެސިލިޓީއެއް މިހާރު ދަނީ ހިންގަމުންނެވެ.

މި ހިސާބުތަކުން އެނގޭ ގޮތުގައި ރާއްޖޭގެ ޓޫރިޒަމްގެ އެންމެ ބޮޑު ހިއްސާއެއް އަދިވެސް ކުރަނީ ރިސޯޓުތަކުންނެވެ. ނަމަވެސް ލޯކަލް ޓޫރިޒަމް ނުވަތަ ގެސްޓްހައުސްތަކުގެ އަދަދު 900 އިން މައްޗަށް އަރާފައިވުމަކީ ފާހަގަކޮށްލެވޭ ބޮޑު ކުރިއެރުމެކެވެ. ނަމަވެސް ރާއްޖޭގެ ފަތުރުވެރިކަމުގެ ސިނާއަތުގައި ފަތުރުވެރިންނަށް ޚިދުމަތް ދިނުމަށް އޮޕަރޭޓްކުރާ ޖުމްލަ އެނދުގެ އަދަދު ހުރީ 67،868 ގަ އެވެ. އެގޮތުން ރާއްޖޭގައި ފަތުރުވެރިންނަށް ޚިދުމަތް ދިނުމަށް ރަޖިސްޓްރީކޮށް، އޮޕަރޭޝަނުގައި ހުރި އެނދުގެ ބޮޑު ހިއްސާއެއް ކުރަނީ ރިސޯޓުތަކުންނެވެ. އެގޮތުން ޖުމްލަ އެނދުގެ ތެރެއިން 44,977 އެނދަކީ ރިސޯޓު އެނދެވެ.