މޯލްޑިވްސް ފައިނޭންޝަލް އެކްސްޕޯ ރައީސް ހުޅުވައި ދެއްވައިފި

ރާއްޖޭގެ ފައިނޭންޝަލް ސެކްޓަރ ޚާއްސަކޮށްގެން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ މޯލްޑިވްސް ފައިނޭންޝަލް އެކްސްޕޯ ރައީސް ޑރ. މުހައްމަދު މުއިއްޒު ހުޅުވާ ދެއްވައިފި އެވެ.  

އެމްއެމްއޭ އިން އިންތިޒާމުކޮށްގެން، މާލީ ދާއިރާގެ ހިދުމަތްތަކަށް ހާއްސަކޮށް ބާއްވާ މި އެކްސްޕޯ ކުރިއަށް ދާނީ ޖުލައި 2 އިން 4 އަށް ހުޅުމާލެ ސެންޓްރަލް ޕާކުގަ އެވެ. މޯލްޑިވްސް ފައިނޭންޝަލް އެކްސްޕޯ އަކީ މާލީ ކަންކަމާ ގުޅޭގޮތުން އާންމުން ހޭލުންތެރިކުރުމަށާއި މާލީ ހިދުމަތްދޭ ފަރާތްތަކާ އެއް ފުރާޅެއްގެ ދަށުން ބައްދަލުވެ މައުލޫމާތު ލިބިގަތުމަށް މަގުފަހި ކުރުމުގެ ގޮތުން އެމްއެމްއޭ އިން ކުރިއަށް ގެންދާ ހަރަކާތެކެވެ. މި އަހަރުގެ އެކްސްޕޯގައި 30 ފަރާތަކުން ބައިވެރިވެފައިވެ އެވެ. 

މި އެކްސްޕޯގައި މާލީ ދާއިރާއާ ގުޅުންހުރި ގިނަ ހަރަކާތްތަކެއް ކުރިއަށްދާނެ އެވެ. މިގޮތުން އެކި ދާއިރާތަކުން ޕެނަލް ޑިސްކަޝަންތަކާއި ފައިނޭންޝަލް ލިޓްރެސީއަށް ހޭލުންތެރި ކުރުމުގެ ހަރަކާތްތައްވެސް އޮންނާނެ އެވެ. އަދި ރާއްޖޭގެ ބޭންކިން ދާއިރާގައި ހުރި ފުރުސަތުތައް މި އެކްސްޕޯގެ ތެރެއިން ކިޔައިދޭނެ އެވެ. 

މި އެކްސްޕޯ ހުޅުވައި ދެއްވީ ރައީސް ޑރ. މުއިއްޒު އެވެ. އަދި މި ރަސްމިއްޔާތުގައި ގަވަރުނަރު އަހުމަދު މުނައްވަރުގެ އިތުރުން ފިނޭންސް މިނިސްޓަރު ޙަސަން ޒަރީރު އާއި މާލީ ދާއިރާގެ ގިނަ ފަރާތްތަކުން ބައިވެރިވެ އެވެ. މީގެ ކުރިން ދެ ފަހަރެއްގެ މަތިން އެމްއެމްއޭ އިން ފައިނޭންޝަލް އެކްސްޕޯ ކުރިއަށް ގެންދިޔައެވެ. 2015 އަދި 2017ގެ މި އެކްސްޕޯތަކަށް ވެސް ބޮޑު ތަރުހީބެއް ލިބިފައިވެއެވެ.