ޑީބީއެމްގެ ހިއްސާ ބޭރު ބަޔަކަށް ވިއްކާލި ވާހަކަ ދޮގު ކުރައްވައިފި
ކުރީގެ ރައީސް ޔާމީންގެ ދައުރުގައި ޗީފް އޮފް ސްޓާފްގެ މަގާމުގައި ހުންނެވި އަހުމަދު މުސްތަފާ އެކްސްގައި ކުރި ޕޯސްޓެއްގައި ވަނީ ޑީބީއެމްގެ 80 ޕަސެންޓް 10 މިލިއަން ޑޮލަރަށް ވިއްކާލާފައިވާ ކަމަށެވެ. އެ ހިއްސާ ވިއްކާލީ ޖޭޕީ މޯގަން ކުންފުންޏަށެވެ.
ޑިވަލޮޕްމަންޓް ބޭންކު އޮފް މޯލްޑިވްސް (ޑީބީއެމް) ގެ ބޮޑު ހިއްސާއެއް ބޭރު ފަރާތަކަށް ވިއްކާލާފައިވާ ކަމަށް ސޯޝަލް މީޑިއާގައި ދެކެވުނު ވާހަކަތައް ރައީސް ޑރ. މުހައްމަދު މުއިއްޒު ދޮގު ކުރައްވައިފި އެވެ.
ކުރީގެ ރައީސް އަބްދުﷲ ޔާމީންގެ ދައުރުގައި ޗީފް އޮފް ސްޓާފްގެ މަގާމުގައި ހުންނެވި އަހުމަދު މުސްތަފާ އެކްސްގައި ކުރި ޕޯސްޓެއްގައި ވަނީ ޑީބީއެމްގެ 80 ޕަސެންޓް 10 މިލިއަން ޑޮލަރަށް ވިއްކާލާފައިވާ ކަމަށެވެ. އެ ހިއްސާ ވިއްކާލީ ޖޭޕީ މޯގަން ކުންފުންޏަށް ކަމަށް އޭނާ ތުހުމަތު ކުރި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެއީ ހަގީގަތެއްތޯ ރައީސް އާ ސުވާލު ކުރުމުން އެމަނިކުފާނު އެކަން ދޮގު ކުރެއްވި އެވެ.
"ޑިވަލޮޕްމަންޓް ބޭންކް އޮފް މޯލްޑިވްސްގެ ކަންކަމަކީ އެއީ ތެދު ވާހަކައެއް ނޫން. ޖޭޕީ މޯގަން އާ ގުޅުވައިގެން ދެކެވޭ ވާހަކައަކީ ވެސް ހަގީގަތެއް ނޫން." ރައީސް ވިދާޅުވި އެވެ.
ސަރުކާރުން ޑީބީއެމް އުފައްދާފައި ވަނީ ރާއްޖޭގެ ތަރައްގީގެ މަޝްރޫއުތައް ހިންގުމަށް ބޭރުގެ އިންވެސްޓްމަންޓުތައް ހޯދުމަށެވެ.
ކޮމެންޓް
Republic of Maldives