ޕާސަނަލް ލޯނު ނެގި މިންވަރު 9 ބިލިއަނާ ގާތަށް | 17.4 ޕަސެންޓް އިތުރު

ރާއްޖޭގެ ބޭންކުތަކާއި މާލީ އިދާރާތަކުން އަމިއްލަ ފަރާތްތަކަށް ދޫކޮށްފައިވާ ޕާސަނަލް ލޯނު މި އަހަރު ނެގި މިންވަރު 9 ބިލިއަން ރުފިޔާ ގާތަށް އިތުރުވެ، 17 ޕަސެންޓުގެ އިތުރުވުމެއް ފާހަގަ ވެއްޖެ އެވެ. 

ރާއްޖޭގެ މަރުކަޒީ ބޭންކުގެ ހިސާބުތައް ދައްކާ ގޮތުން އެޕްރީލް މަހުގެ ނިޔަލަށް ޕާސަނަލް ލޯނުގެ ގޮތުގައި ދޫކޮށްފައިވާ ޖުމްލަ ގާތްގަނޑަކަށް 8.9 ބިލިއަން ރުފިޔާ އަށް އަރާފައެވެ. މިއީ ބޮޑު އިތުރުވުމެކެވެ. 

އަހަރުން އަހަރަށް ބެލިނަމަވެސް ޕާސަނަލް ލޯނުގެ މާކެޓަށް އަހަރަކުން އަހަރަކަށް އަންނަނީ ވަރަށް ބޮޑު ކުރިއެރުމެއް ލިބެމުންނެވެ. އެގޮތުން ކޮންމެ އަހަރެއްގެ ނިޔަލަށް ލޯނު ދޫކޮށްފައިވާ ޖުމްލަ ވެސް ވަނީ އިތުރުވެފަ އެވެ. 

މި ހިސާބުތަކަށް ބަލާއިރު، މިދިޔައަހަރުގެ ކުރީކޮޅާ އަޅާބަލާއިރު މިއަހަރުގެ ކުރީކޮޅު ޕާސަނަލް ލޯނު ދޫކުރި މިންވަރު އެވްރެޖްކޮށް 17 ޕަސެންޓާއި 19 ޕަސެންޓާ ދެމެދުގެ ނިސްބަތަކުން ވަނީ މަތިވެފަ އެވެ.

ލޯނު އިތުރުވާން މެދުވެރިވާ ސަބަބުތައް 

ފަހަކަށް އައިސް ރާއްޖޭގެ ބޭންކުތަކުން (ހާއްސަކޮށް ބީއެމްއެލް އަދި އިސްލާމިކް ބޭންކް ފަދަ އިދާރާތަކުން) ޕާސަނަލް ލޯނާއި ކްރެޑިޓް ފެސިލިޓީތައް ދޫކުރުމުގެ މަރުހަލާތައް ވަނީ ވަރަށް ބޮޑަށް ލުއިކޮށްފަ އެވެ. ގިނަ ލޯނުތަކަކީ އެއްވެސް ރަހުނެއް  ބެހެއްޓުމަކާ ނުލައި މޮބައިލް އެޕްލިކޭޝަން މެދުވެރިކޮށް ވަގުތުން ލިބޭ ގޮތަށް ފަރުމާކޮށްފައިވާ ލޯނުތަކެކެވެ. މީގެ ސަބަބުން ލޯނު ނަގާ މީހުންގެ އަދަދު ވަރަށް ބޮޑަށް އިތުރުވެ އެވެ. އަނެއް ސަބަބަކީ ތަކެތީގެ އަގުތަކާއި، ކުލީގެ އިތުރުން ދިރިއުޅުމުގެ އާންމު ހަރަދުތައް މަތިވަމުންދިއުމުގެ ސަބަބުން، ކުއްލިއަކަށް ދިމާވާ ބޮޑެތި ހަރަދުތައް ހަމަޖެއްސުމަށް އާންމުން ޕާސަނަލް ލޯނަށް ބަރޯސާވާ މިންވަރު އިތުރުވުމެވެ.