މޫސުން ގޯސްވެ، ބޮޑު ބަޔަކަށް ވައިޓް އެލާޓް

މޫސުން ގޯސްވެ، ރާއްޖޭގެ އެންމެ ބޮޑު ބަޔަކަށް ވައިޓް އެލާޓް ނެރެފި އެވެ.

މިރޭ 9:00 އިން ދަންވަރު 3:00 އާ ހަމަޔަށް އެލާޓް ނެރެފައި ވަނީ ހއ. އަތޮޅުން ފެށިގެން ލ. އަތޮޅަށެވެ. އެ އެލާޓުގައި ވަނީ އެ ސަރަހައްދަށް ބޯކޮށް ވާރޭވެހި، ގުގުރާނެ ކަމަށް ލަފާކުރެވޭ ކަމަށެވެ. 

އަދި ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށާއި ކަނޑުތައްވެސް ގަދަވާނެ ކަމަށް އެ އެލާޓުގައިވެ އެވެ.

މޫސުން ގޯސްވެ، ކަނޑުގަދަ ނަމަ، ހާއްސަކޮށް ކަނޑުދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށް އިދާރާތަކުން އަބަދުވެސް އިލްތިމާސް ކުރެ އެވެ. އަދި ވާރޭވެހޭނަމަ، ގޭގެއަށް ފެން ނުވަންނަނާނެހެން ވެލި ބަސްތާފަދަ ތަކެތި ޖަހައި، ސަލާމަތޫ ފިޔަވަޅުތައް އެޅުމަށްވެސް އިލްތިމާސް ކުރެ އެވެ.