މިދިޔަ 24 ގަޑިއިރު | ދުނިޔެއަށް ބާރުގަދަ ބިން ހެލުންތަކެއް

ފާއިތުވި 24 ގަޑިއިރުގެ ތެރޭގައި ދުނިޔޭގެ ތިން ސަރަހައްދެއް ކަމަށްވާ އެމެރިކާގެ އުތުރު ކެލިފޯނިއާ، ޖަޕާން އަދި ވެނެޒުއެލާއަށް ބާރުގަދަ ބިންހެލުންތަކެއް އައިސް، ކަމާބެހޭ އިދާރާތަކުން ކުއްލި ހާލަތްތަކުގައި ހަރަކާތްތެރިވާން ފަށައިފިއެވެ.

ސައިންސްވެރިން ހާމަކުރާ ގޮތުގައި މި ބިންހެލުންތަކަކީ ވަކިވަކިން، އެކި ސަރަހައްދުތަކުގެ ޓެކްޓޯނިކް ޕްލޭޓްތަކަށް އައި ބަދަލުތަކުގެ ސަބަބުން ދިމާވި، އެއްވެސް ގުޅުމެއް ނެތް ހާދިސާތަކެކެވެ. ނަމަވެސް، މި ހާދިސާތަކުގައި ލިބުނު ގެއްލުންތަކުގެ މިންވަރު އެކި ގައުމުތަކުގައި ވަރަށް ތަފާތެވެ.

އެންމެ ބޮޑު ގެއްލުމެއްލިބި، ގިނަ ބަޔަކު މަރުވީ ވެނެޒުއެލާއަށް އައި ބިންހެލުންތަކުގައެވެ. އެ ގައުމަށް ރިކްޓަރ މިންގަނޑުން 7.2 އާއި 7.5 ގެ ބާރުގަދަ ދެ ބިންހެލުމެއް ޖެހިޖެހިގެން އައިސްފައިވެ އެވެ. ވެރިރަށް ކަރަކާސް ހިމެނޭހެން ގިނަ އިމާރާތްތަކެއް ވަނީ ބިމާހަމަވެފަ އެވެ. 

މިހާތަނަށް މަދުވެގެން 164 މީހުން މަރުވެފައިވާކަން ވަނީ ކަށަވަރު ކުރެވިފަ އެވެ. އަދިވެސް ގިނަ ބަޔަކު އިމާރާތްތަކުގެ ދަށުގައި ތާށިވެފައި ތިބުމުން މި އަދަދު އިތުރުވުން އެކަށީގެންވެ އެވެ. ވެނެޒުއެލާ ސަރުކާރުން މިހާރު ވަނީ ގައުމުގައި ކުއްލި ހާލަތު އިއުލާންކޮށް، މީހުން ސަލާމަތްކުރުމުގެ ފުޅާ ހަރަކާތްތަކެއް ފަށާފައެވެ.

ބުރާސްފަތި ދުވަހުގެ ކުރީކޮޅު އެމެރިކާގެ އުތުރު ކެލިފޯނިއާގެ ވިލިޓްސް ސަރަހައްދަށް ރިކްޓަރ މިންގަނޑުން 5.6 ގެ ބިންހެލުމެއް އައިސްފައިވެ އެވެ. މިއީ 1940 ވަނަ އަހަރުގެ ފަހުން އެ ސަރަހައްދަށް އައި އެންމެ ބާރުގަދަ ބިންހެލުމެވެ. މި ބިންހެލުމުގެ ސަބަބުން ބައެއް ހިސާބުތަކުން ކަރަންޓުގެ ހިދުމަތް ކެނޑި، މަދު ބަޔަކަށް ކުދި އަނިޔާތައް ލިބުނު ނަމަވެސް، ބޮޑު އެއްވެސް އިމާރާތަކަށް ސީރިއަސް ގެއްލުމެއް ލިބުނު ކަމުގެ ރިޕޯޓެއް ލިބިފައެއް ނުވެ އެވެ. ސިސްމޮލޮޖިސްޓުން (ބިންހެލުންތަކާ ބެހޭ މާހިރުން) ބުނާ ގޮތުގައި މިއީ ކަސްކޭޑިއާ ސަބްޑަކްޝަން ޒޯން ކައިރީގައި ހިނގި ހާދިސާއެކެވެ.

ޖަޕާނުގެ އުތުރުައް އޮންނަ ކަނޑުގެ ސަރަހައްދަށް ރިކްޓަރ މިންގަނޑުން 6.9 ގެ ބާރުގަދަ ބިންހެލުމެއް އައިސްފައިވެ އެވެ.
ބިންހެލުމާ އެކު ސުނާމީގެ ނުރައްކަލެއް އޮތްތޯ ކަމާބެހޭ އިދާރާތަކުން ބެލުމަށްފަހު، އެފަދަ ނުރައްކަލެއް ނެތް ކަމަށް ވަނީ ކަނޑައަޅާފަ އެވެ. 

ޖަޕާނަކީ ދުނިޔޭގެ އެންމެ ބިންހެލުން ގިނަ "ރިންގް އޮފް ފަޔަރ" ސަރަހައްދުގައި އޮންނަ ގައުމަކަށް ވިޔަސް، އެ ގައުމުގެ އިމާރާތްކުރުމުގެ ހަރުދަނާ މިންގަނޑުތަކުގެ ސަބަބުން މި ހާދިސާގައި ބޮޑު ގެއްލުމެއް ނުވަތަ މީހަކަށް އަނިޔާއެއް ލިބުނު ކަމުގެ ރިޕޯޓެއް ނެތެވެ.

ދުނިޔޭގެ އެކި ކޮޅުތަކަށް އައި މި ބިންހެލުންތަކުން ދޭހަކޮށްދެނީ، ޓެކްޓޯނިކް ޕްލޭޓްތަކަށް އަންނަ ބަދަލުތަކުގެ ސަބަބުން ކޮންމެ ވަގުތެއްގައިވެސް ނުރައްކާތެރި ބިންހެލުމެއް ދިމާވެދާނެ ކަމެވެ. މިހާރު ކަމާބެހޭ ސައިންސްވެރިން ދަނީ މި ސަރަހައްދުތަކަށް އަންނަ ލޮޅުންތައް މޮނިޓަރު ކުރަމުންނެވެ.