އެމްޕީއެލްއިން މިދިޔަ ހަފުތާ 36,943.31 ފްރެއިޓް ޓަނުގެ މުދާ ނެރެފި

މާލެ ވިޔަފާރި ބަނދަރު ބަލަހައްޓާ އެމްޕީއެލްގެ މަސައްކަތް ހަލުވިކޮށް، މިދިޔަ ހަފުތާ 36,943.31 ފްރެއިޓް ޓަނުގެ މުދާ ނެރެފި އެވެ. 

އެމްޕީއެލްގެ ތަފާސް ހިސާބުތައް ދައްކާ ގޮތުން މިމަހުގެ 20-14ގެ ނިޔަލަށް ކޮންޓޭނަރު އާގު ބޯޓުފަހަރާއި ޖެނެރަލް ކާގޯ ބޯޓު ފަހަރުން ޖުމްލަ 36,943.31 ފްރެއިޓް ޓަންގެ މުދާ ވަނީ ކްލިއަ ކޮށްފައެވެ.

މި ހިސާބުތައް ދައްކާ ގޮތުން ޖުމްލަ ގޮތެއްގައި މިދިޔަ ހަފުތާގައި ދެ ބާވަތުގެ ބޯޓު ފަހަރުން 1,715 ކޮންސައިންމަންޓެއް ވަނީ ކާމިޔާބުކަމާއެކު ބަނދަރުން ކްލިއަ ކޮށްފައެވެ.

މި މުއްދަތުގައި ރާއްޖެ އަށް ބޯޓުފަހަރު އައުމާއި ފުރުމުގެ ހަރަކާތްތަކަށް ބަލާއިރު، ޖުމްލަ ތިން ކޮންޓޭނަރު ބޯޓާއި ހަތް ޖެނެރަލް ކާގޯ ބޯޓު ރާއްޖެއަށް އައިސްފައިވެ އެވެ. އަދި މި މުއްދަތުގައި އެއް ކޮންޓޭނަރު ބޯޓާއި ފަސް ޖެނެރަލް ކާގޯ ބޯޓު ވަނީ ފުރާފަ އެވެ.

މި ހިސާބުތައް ދައްކާ ގޮތުން ކޮންޓޭނަރުގެ ޖުމްލަ މޫވްމަންޓް ނުވަތަ ތުރޫޕުޓް ހުރީ 20 ފޫޓުގެ 3,243 ޓީޔޫއެސްގަ އެވެ. 

އެމްޕީއެލް އިން ދަނީ ރާއްޖެއަށް އެތެރެކުރާ މުދާ ބަނދަރުން ނެރުމާއި ކްލިއަރެންސް މަރުހަލާތައް އަވަސްކުރުމަށް އަންނަނީ ބަނދަރުގެ އޮޕަރޭޝަންތައް ހަރުދަނާކުރަން މަސައްކަތް ކުރަމުންނެވެ. މިގޮތުން މުދާ ކްލިއަރެންސްގެ މަސައްކަތްތައް ހަލުވި މިނެއްގައި ހިފެހެއްޓުމަކީ ބާޒާރުގައި މުދަލުގެ އަގުތައް އެއްވަރެއްގައި ހިފެހެއްޓުމަށާއި، ވިޔަފާރިވެރިންނަށް ދިމާވާ ދަތިތައް ހައްލުކުރުމަށް ލިބޭ ބޮޑު ބާރަކަށްވެ އެވެ.