ކޭވް ޑައިވް އޮޕަރޭޝަންގައި ބައިވެރިވި ސިފައިންނާއި ފުލުހުންގެ އަގުވަޒަންކޮށްފި

ވ. އަތޮޅުގެ ކަނޑު އަޑީގެ ހޮހޮޅައެއްގައި ފަސް ޓޫރިސްޓުން މަރުވި ހާދިސާ އާ ގުޅިގެން ސިފައިންނާއި ފުލުހުން ކުރިޔަށް ގެންދިޔަ އޮޕަރޭޝަންގައި ބައިވެރިވި ފަރާތްތަކުގެ އަގު ވަޒަން ކޮށްފި އެވެ.

އެ ފަރާތްތަކުގެ އަގުވަޒަން ކުރުމަށް އިއްޔެ ބޭއްވި ހާއްސަ ރަސްމިއްޔާތުގައި ރައީސް ޑރ. މުހައްމަދު މުއިއްޒުގެ ފަރާތުން ބައިވެރިވެވަޑައިގެންނެވީ ހޯމް މިނިސްޓަރު އަލީ އިހުސާން އާއި ޑިފެންސް މިނިސްޓަރު ހަސަން ރަޝީދެވެ.

އެ އޮޕަރޭޝަންގައި ބައިވެރިވި ފުލުހުންނާއި ސިފައިން ދެއްކެވި ސާބިތުކަމާއި ކުރެއްވި ބުރަ މަސައްކަތް ކޮށް އެކަމުގެ އަގުވަޒަން ކުރުމުގެ ގޮތުން ވަނީ ހަނދާނީ ލިޔުމެއް ހަވާލު ކޮށްފަ އެވެ. 

އެގޮތުން ހަ ފުލުހަކާއި ސިފައިންގެ ފަސް އޮފިސަރެއްގެ އަގު ވަޒަން ކޮށްފައިވެ އެވެ.

ފީނަނިކޮށް ގެއްލުން އިޓަލީ ޓޫރިސްޓުން ހޯދުމުގެ އޮޕަރޭޝަނުގެ ތެރެއިން ސްޓާފް ސާޖަންޓު މުހައްމަދު މަހުދީ ވަނީ ނިޔާ ވެފަ އެވެ. އޭނާގެ ހަށިގަނޑު ނަގާފައި ވަނީ ސިފައިންނާއެކީ އެ އޮޕަރޭޝަނުގައި ބައިވެރިވި ފުލުހުންގެ ރެސްކިޔު ޑައިވަރުންގެ ޓީމުންނެވެ.

ދުނިޔޭގެ ސަމާލުކަން ލިބުނު އެ ހާދިސާ އާ ގުޅިގެން ބޭރުގެ ހާއްސަ ޑައިވިން ޓީމުތަކެއް ވަނީ ރާއްޖެ އަށް އައިސް އެ ފަތުރުވެރިންގެ ހަށިގަނޑު ރިކަވާ ކޮށްފަ އެވެ.