ޕޭޕަލްއަކީ ބައިނަލްއަގުވާމީ ޑިޖިޓަލް ބާޒާރަށް ދިވެހިން ވަންނާނެ ދޮރެއް : ސައީދު

ރާއްޖެއަށް ޕޭޕަލްގެ ހިދުމަތަކީ ބައިނަލްއަގުވާމީ ޑިޖިޓަލް ބާޒާރަށް ދިވެހި ވިޔަފާރިތަކާއި އާއްމުން ވަންނާނެ ދޮރަކަށް ވެގެންދާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ. 

ރާއްޖެއަށް ޕޭޕަލްގެ ހިދުމަތް ތައާރަފު ކުރަން ބޭއްވި ރަސްމިއްޔާތުގައި މި ސަރުކާރުގެ އިގްތިސާދީ ތަރައްގީ އާއި ދަތުރުފަތުރާއި ވިޔަފާރިއާ ބެހޭ ވަޒީރު ސައީދު ވިދާޅުވީ  ދުނިޔޭގެ ބާޒާރުގައި ދިވެހިން މުޢާމަލާތްކުރުމަށް ހުރި އެންމެ ބޮޑު އެއް ހުރަސް ނައްތާލެވިއްޖެކަން ފާހަގަކުރައްވައި ވަޒީރު ވިދާޅުވީ، މިއީ 17 ނޮވެންބަރު 2023ގައި ރައީސް ޑރ. މުޙައްމަދު މުއިއްޒު ވެރިކަމާ ޙަވާލުވެވަޑައިގަތުމަށް ފަހު، މި ދާއިރާ ކުރިއެރުވުމަށްޓަކައި މެދުކެނޑުމެއްނެތި ކުރެއްވި މިންނަތް މަސައްކަތްޕުޅުގެ ފޮނި ނަތީޖާ ކަމަށެވެ. އަދި ރާއްޖޭގެ މާލީ ނިޒާމުގެ ތެރެއަށް ޕޭޕަލް ފުރިހަމައަށް ގުޅިގެން ދިޔުމަކީ ރާއްޖޭގެ ވިޔަފާރީގެ ދާއިރާއަށް ލިބުނު ތާރީޚީ ކާމިޔާބީއެއްގެ ގޮތުގައި އެމަނިކުފާނު ސިފަކުރެއްވިއެވެ.

މިނިސްޓަރު އިތުރަށް ވިދާޅުވީ ޤައުމުގެ އާބާދީ މަދުވުމާއި ރާއްޖެ އުފެދިފައިވާ ޖަޒީރާވަންތަ ގޮތަކީ ޒަމާނީ ޓެކްނޮލޮޖީގެ ރޭހުގައ ދިވެހިން ފަހަތަށް ޖެހެންޖެހޭ ސަބަބެއް ނޫންކަން މި އިންގިލާބީ ބަދަލުން ސާބިތުކޮށްދީފި ކަމަށާ، ހަރުދަނާ ލީޑަރޝިޕަކާ އެކު ސާފު ތަސައްވުރެއް އޮވެގެން އަމާޒަށް ވާސިލުވުމަށް މަސައްކަތްކޮށްފިނަމަ ބޭނުންވާ ނަތީޖާ ނެރެވޭނެކަމުގެ ޔަގީންކަން ވަޒީރު ދެއްވި އެވެ. 

މިނިސްޓަރު ސައީދު ވިދާޅުވި ގޮތުގައި ދުނިޔޭގައި ބައި ބިލިއަނާ ގާތްކުރާ އަދަދަކަށް އެކްޓިވް އެކައުންޓް ގެންގުޅޭ ޕޭޕަލް ފަދަ ބޮޑު ނެޓްވޯކެއްގެ ދޮރުތައް ހުޅުވައިލަނީ އިއްތިފާގަކުން ނޫނެވެ.

"އަޅުގަނޑުމެންގެ ދަތުރަކީ ހަމައެކަނި ވަގުތީ، ލޯކަލް ބަދަލެއް ހޯދުމެއް ނޫން. އޭގެ ބަދަލުގައި، އަޅުގަނޑުމެން ސިސްޓަމެޓިކްކޮށް ހަރުދަނާ ރެގިއުލޭޓަރީ ޕްލެޓްފޯމެއް ބިނާކޮށް، ގާނޫނީ ގޮންޖެހުންތައް ހައްލުކޮށް، ބައިނަލްއަޤްވާމީ އިތުބާރު ހޯދި. އެ އަސާސްގެ މަތީގައި ޕޭޕަލްއިން އެމީހުންގެ ނެޓްވޯކް ގާއިމުކޮށް، މި ބައިނަލްއަޤްވާމީ އޮނިގަނޑު ރައްޔިތުންނާ ހަމައަށް ފޯރުކޮށްދިނުމަށް ބައިވެރިއެއްގެ ގޮތުގައި އުރީދޫ އިޚްތިޔާރުކުރީ،" ސައީދު ވިދާޅުވި އެވެ. 

މިނިސްޓަރު ސައީދު ވަނީ ރާއްޖޭގެ ކްރިއޭޓަރުންނާއި، ފްރީލާންސަރުން އަދި ޑިޖިޓަލް މަސައްކަތްތަކުގައި ތިބި ޒުވާން ވިޔަފާރިވެރިންނަށް މި ފުރުސަތުގެ ބޭނުން ހިފަން އެދިފަ އެވެ.