މަޖިލީހުގެ ރިޔާސަތު ބަލަހައްޓަވައި މެމްބަރުންގެ ލިސްޓަށް ބަދަލެއް، އެންމެ ކުރީގައި ސިޔާމް

ރައްޔިތުންގެ މަޖިލީހުގެ ރައީސާއި ނައިބު ރައީސް ނެތް ހާލަތުގައި، މަޖިލީހުގެ ރިޔާސަތު ބަލަހައްޓަވައި ލިސްޓުގެ ތަރުތީބަށް މަޖިލީހުން މިއަދު ބަދަލު ގެނެސްފި އެވެ.

އެ ބަދަލު ގެންނަން ޖެހުނީ، މަޖިލީހުގެ ނައިބު ރައީސްކަމުގެ މަގާމުގައި ކުރިން ހުންނެވި ދިއްގަރު ދާއިރާގެ މެމްބަރު އަހުމަދު ނާޒިމް ވަކިކޮށް، އެ މަގާމަށް އޭދަފުށި ދާއިރާގެ މެމްބަރު އަހުމަދު ސަލީމް (ރެޑްވޭވް) އިންތިހާބު ކުރުމާ ގުޅިގެންނެވެ.

ސަލީމަކީ ކުރިން އެ ލިސްޓުގައި އިންނެވި މެމްބަރަކެވެ.

މަޖިލީހުގެ ރިޔާސަތުން މިއަދު އިއުލާނުކުރި ލިސްޓުގައި، މަޖިލީހުގެ ރައީސާއި ނައިބު ރައީސް ހާޒިރުވެވަޑައިގެން ނެތް ހާލަތެއްގައި، ރިޔާސަތު ބެލެހެއްޓުމުގެ ލިސްޓުގެ އެންމެ ކުރީގައި އޮންނެވީ، މީދޫ ދާއިރާގެ މެމްބަރު އަހުމަދު ސިޔާމް މުހައްމަދު އެވެ.

މަޖިލީހުގެ ރައީސް އަދި ނައިބުރައީސް މަޖިލީހަށް ހާޒިރުނުވާ ހާލަތެއްގައި ނުވަތަ އެ ނޫން ވެސް އެހެން ހާލަތެއް މެދުވެރިވެގެން ރިޔާސަތު އެ ދެ ބޭފުޅުންކުރެ ބޭފުޅަކަށް ނުބެލެހެއްޓޭ ހާލަތުގައި ރިޔާސަތު ބަލަހައްޓާނެ މެމްބަރުންގެ ތަރުތީބެއް މަޖިލީހުގެ ގަވާއިދުގެ ދަށުން އެކުލަވައިލަން ޖެހެ އެވެ.

އެ މެމްބަރުންގެ ތަރުތީބު ކަނޑައަޅަން ޖެހެނީ މަޖިލީހުގެ މެންބަރުންގެ ތެރެއިން އެންމެ ދިގު މުއްދަތަކަށް މަޖިލިސް މެމްބަރުކަން ކޮށްފައިވާ ބޭފުޅުންނަށް އިސްކަން ދީގެންނެވެ.