ގަވާއިދާ އެއްގޮތަށް ކާބޯތަކެތި ލޭބަލް ކުރަން 6 މަހުގެ މުއްދަތެއް
އެގޮތުން، ޕެކެޓްކޮށް ލޭބަލްކޮށްފައިވާ ތަކެތި، ކާބޯތަކެތި ވިއްކައި، އިމްޕޯޓް އަދި އެކްސްޕޯޓް ކުރާ ފަރާތްތަކުން ކަނޑައަޅާފައިވާ މިންގަނޑުތަކަށް ފައްތަން ކުރަން ޖެހޭ ކަންކަން ކުރުމަށް ހަ މަސްދުވަހުގެ މުއްދަތެއް ދީފައިވެ އެވެ.
ގަވާއިދާ އެއްގޮތަށް ކާބޯތަކެތި ލޭބަލް ކުރުމަށް ހަ މަސް ދުވަހުގެ މުއްދަތެއް، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ދީފި އެވެ.
އެމްއެފްޑީއޭއިން މިއަދު ކުރި އިއުލާނެއްގައި ބުނީ، ކާބޯތަކެތި ރައްކާތެރިކުރުމުގެ ގާނޫނުގެ ދަށުން މިދިޔަ އަންގާރަ ދުވަހު ނެރެފައިވާ "ކާބޯތަކެތި ބަންދުކުރުމާއި ލޭބަލްކުރުމުގެ ގަވައިދު" ގައިވާ ގޮތުގެ މަތިން ކާބޯތަކެތި ލޭބަލް ކުރުމަށް ވަކި މުއްދަތެއް ދިނުމަށް ކަނޑައަޅާފައިވާ ކަމަށެވެ.
އެގޮތުން، ޕެކެޓްކޮށް ލޭބަލްކޮށްފައިވާ ތަކެތި، ކާބޯތަކެތި ވިއްކައި، އިމްޕޯޓް އަދި އެކްސްޕޯޓް ކުރާ ފަރާތްތަކުން ކަނޑައަޅާފައިވާ މިންގަނޑުތަކަށް ފައްތަން ކުރަން ޖެހޭ ކަންކަން ކުރުމަށް ހަ މަސްދުވަހުގެ މުއްދަތެއް އެ ގަވާއިދުގެ ދަށުން ދީފައިވާ ކަމަށެވެ.
އާ ގަވާއިދުގައިވާ ގޮތުގައި، ކާބޯތަކެތި ބަންދުކުރުމާއި ލޭބަލްކުރުމުގެ ގަވައިދާ ހިލާފުވެއްޖެ ނަމަ ބޮޑެތި އަދަދުތަކުން ޖޫރިމަނާކުރެވޭ ގޮތް ވަނީ ހަދައިފަ އެވެ.
އެގޮތުން؛
- މީހެއްގެ އަމިއްލަ ނަމުގައި ނުވަތަ އޭނާގެ ފަރާތުން އެހެން މީހަކު މެދުވެރިވެގެން އަސްލު އޮޅޭގޮތަށް ލޭބަލްކޮށްފައިވާ ކާބޯތަކެތި ރާއްޖެއަށް އެތެރެކުރުމަކީ ނުވަތަ ވިޔަފާރީގެ ބޭނުމަށް އުފެއްދުމަކީ ނުވަތަ ތައްޔާރުކުރުމަކީ ނުވަތަ ބަންދުކުރުމަކީ ނުވަތަ ގަނެ ވިއްކުމަކީ މަނާ ކަމެއް. އެއާ ހިލާފުވެއްޖެ ނަމަ 10،000-70،000ރ. އާ ދެމެދުގެ އަދަދަކުން ޖޫރިމަނާކޮށް، އެ މީހެއްގެ ލައިސަންސް ވަކި މުއްދަތަކަށް ހިފަހައްޓައި ރަޖިސްޓްރީ ބާތިލްކުރާނެ.
- އަލުން ރަޖިސްޓްރީކޮށް ނުވަތަ ލައިސެންސް ދޭނީ އެކަމެއް ރަނގަޅުކޮށް ލައިސެންސު ހިފެހެއްޓި މުއްދަތު ހަމަވުމުން.
- އެ ގަވައިދާ ފުރަތަމަ ފަހަރަށް ހިލާފުވެއްޖެނަމަ 10،000ރ. އިން ޖޫރިމަނާކޮށް ހަތް ދުވަހަށް ލައިސެންސް ހިފަހައްޓާނެ. ދެ ވަނަ ފަހަރު ނަމަ 100،000ރ. އިން ޖޫރިމަނާކޮށް 15 ދުވަހަށް ލައިސެންސް ހިފަހައްޓާނެ.
- ތިން ވަނަ ފަހަރަށް ތަކުރާރުކޮށްފިނަމަ 750،000ރ. އިން ޖޫރިމަނާކޮށް ލައިސެންސް ނުވަތަ ރަޖިސްޓްރީ ބާތިލްވާނެ.
- އެ އަމަލުގެ ސަބަބުން މީހެއްގެ ސިއްހަތަށް ނުރައްކާތެރި ގެއްލުމެއް ލިބިއްޖެނަމަ ނުވަތަ ފުރާނައަށް ނުރައްކާވެއްޖެ ނަމަ އެ އަމަލު ހިންގި ފަރާތެއް އެއް މިލިއަން ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާކޮށް ލައިސެންސް ބާތިލްކުރާނެ.
ލޭބަލްކުރުމެގެ މިންގަނޑާ ހިލާފުވިއަސް 10،000ރ. އާއި 750،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް އެ ގަވާއިދުގައި ބުނެފައިވެ އެވެ.
ކޮމެންޓް
Republic of Maldives