ކާބޯތަކެތި ލޭބަލް ނުކުރާނަމަ، މިލިއަނަކާ ހަމައަށް ޖޫރިމަނާކޮށް، ޖިނާއީ ދައުވާ ކުރަނީ
އެމްއެފްޑީއޭއިން ބުނީ ގަވާއިދާ ހިލާފުވާ މީހުންނަށް އިދާރީ ފިޔަވަޅުގެ އިތުރުން ޖިނާއީ ދައުވާކުރެވޭނެ ކަމަށެވެ.
ރާއްޖޭގައި ވިއްކާ ކާބޯތަކެތި ލޭބަލް ކުރުމުގެ ގަވާއިދު ހަރުކަށިކޮށް، އެ ގަވާއިދާ ހިލާފުވާ ފަރާތްތަކަށް ޖިނާއީ ދައުވާކޮށް، އެއް މިލިއަން ރުފިޔާ އާ ހަމައަށް ޖޫރިމަނާ ކުރެވޭ ގޮތް ހަދައިފި އެވެ.
ކާބޯތަކެތި ރައްކާތެރިކުރުމުގެ ގާނޫނުގެ ދަށުން، ރާއްޖޭގައި އުފައްދާ ތަކެއްޗާއި އެކްސްޕޯޓުކުރާ ކާބޯތަކެއްޗަށް ހާއްސަކޮށްގެން "ކާބޯތަކެތި ބަންދުކުރުމާއި ލޭބަލްކުރުމުގެ ގަވައިދު" އެމްޑީއެފްއޭއިން އިއްޔެ އާންމުކޮށްފައިވާއިރު، އެ ގަވައިދުން ވަނީ އެއްފަހަރު ބޭނުންކޮށްގެން އުކާލާ ޕޮލިއިތެލީން ޓެރެފްތަލޭޓް (ޕީއީޓީ) ފަދަ ޕްލާސްޓިކް ފުޅީގައި ކާބޯތަކެތި ބަންދުކުރުން މަނާކޮށްފަ އެވެ.
އޭގެ އިތުރުން، ކާބޯތަކެތި ބަންދުކުރުމާއި ލޭބަލްކުރުމުގެ ގަވައިދާ ހިލާފުވެއްޖެ ނަމަ ބޮޑެތި އަދަދުތަކުން ޖޫރިމަނާކުރެވޭ ގޮތް ވަނީ ހަދައިފަ އެވެ.
- މީހެއްގެ އަމިއްލަ ނަމުގައި ނުވަތަ އޭނާގެ ފަރާތުން އެހެން މީހަކު މެދުވެރިވެގެން އަސްލު އޮޅޭގޮތަށް ލޭބަލްކޮށްފައިވާ ކާބޯތަކެތި ރާއްޖެއަށް އެތެރެކުރުމަކީ ނުވަތަ ވިޔަފާރީގެ ބޭނުމަށް އުފެއްދުމަކީ ނުވަތަ ތައްޔާރުކުރުމަކީ ނުވަތަ ބަންދުކުރުމަކީ ނުވަތަ ގަނެ ވިއްކުމަކީ މަނާ ކަމެއް. އެއާ ހިލާފުވެއްޖެ ނަމަ 10،000-70،000ރ. އާ ދެމެދުގެ އަދަދަކުން ޖޫރިމަނާކޮށް، އެ މީހެއްގެ ލައިސަންސް ވަކި މުއްދަތަކަށް ހިފަހައްޓައި ރަޖިސްޓްރީ ބާތިލްކުރާނެ.
- އަލުން ރަޖިސްޓްރީކޮށް ނުވަތަ ލައިސެންސް ދޭނީ އެކަމެއް ރަނގަޅުކޮށް ލައިސެންސު ހިފެހެއްޓި މުއްދަތު ހަމަވުމުން.
- އެ ގަވައިދާ ފުރަތަމަ ފަހަރަށް ހިލާފުވެއްޖެނަމަ 10،000ރ. އިން ޖޫރިމަނާކޮށް ހަތް ދުވަހަށް ލައިސެންސް ހިފަހައްޓާނެ. ދެ ވަނަ ފަހަރު ނަމަ 100،000ރ. އިން ޖޫރިމަނާކޮށް 15 ދުވަހަށް ލައިސެންސް ހިފަހައްޓާނެ.
- ތިން ވަނަ ފަހަރަށް ތަކުރާރުކޮށްފިނަމަ 750،000ރ. އިން ޖޫރިމަނާކޮށް ލައިސެންސް ނުވަތަ ރަޖިސްޓްރީ ބާތިލްވާނެ.
- އެ އަމަލުގެ ސަބަބުން މީހެއްގެ ސިއްހަތަށް ނުރައްކާތެރި ގެއްލުމެއް ލިބިއްޖެނަމަ ނުވަތަ ފުރާނައަށް ނުރައްކާވެއްޖެ ނަމަ އެ އަމަލު ހިންގި ފަރާތެއް އެއް މިލިއަން ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާކޮށް ލައިސެންސް ބާތިލްކުރާނެ.
ލޭބަލްކުރުމެގެ މިންގަނޑާ ހިލާފުވިއަސް 10،000ރ. އާއި 750،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް އެ ގަވާއިދުގައި ބުނެފައިވެ އެވެ.
ފަސްވަނަ ފަހަރު ނުވަތަ އެއަށްވުރެ އިތުރަށް ތަކުރާރުކޮށްފިނަމަ އެއް މިލިއަން ރުފިޔާއިން ޖޫރިމަނާކޮށް ލައިސެންސް ބާތިލްކުރެވޭނެ ކަމަށް ބުންޏެވެ.
އެމްއެފްޑީއޭއިން ބުނީ ގަވާއިދާ ހިލާފުވާ މީހުންނަށް އިދާރީ ފިޔަވަޅުގެ އިތުރުން ޖިނާއީ ދައުވާކުރެވޭނެ ކަމަށެވެ.
އަދި ކާބޯތަކެތި ރައްކާތެރިކުރުމުގެ ގަވާއިދާ ހިލާފަށް އެ ތަކެތި އެތެރެކުރުމުގެ ސަބަބުން ގެއްލުމެއް ލިބިއްޖެ ނަމަ ބަދަލު ހޯދުމުގެ ފުރުސަތު އޮންނާނެ ކަމަށް ވެސް ބުނެފައިވެ އެވެ.
ކޮމެންޓް
Republic of Maldives