ނަށަން ދަސްކޮށްދޭން ދެކޮޅު ހެދި ތިން ޓީޗަރަކު ސަސްޕެންޑް
އެޑިއުކޭޝަނުން ބުނާ ގޮތުގައި ދަރިވަރުންނަށް ނަށަން ދަސްކޮށް ދިނުމަކީ މަންހަޖުގައި ހިމެނޭ ކަމެކެވެ. އެފަ ކަންކަމާ ދެކޮޅެއް ނުހެދޭނެ އެވެ.
އއ. އަތޮޅުގެ އުކުޅަސް ސްކޫލުގައި ދަރިވަރުންތަކަކަށް ނަށަން ދަސްކޮށް ދޭން ދެކޮޅު ހެދި ތިން ޓީޗަރަކު ވަޒީފާއިން ސަސްޕެންޑް ކޮށްފި އެވެ.
އެޑިއުކޭޝަން މިނިސްޓްރީގެ ޕާމެނެންޓް ސެކްރެޓަރީ އަހުމަދު އަލީ ސޮއި ކުރެއްވުމަށް ފަހު އެ ތިން ޓީޗަރުން ސަސްޕެންޑް ކޮށްފައިވާ ކަމުގެ ލިޔުން ފޮނުވީ އިއްޔެ އެވެ. އެ ތިން ޓީޗަރުންނަށް ލިޔުމެއް ފޮނުވާފައި ވަނީ އުކުޅަހު ސްކޫލުގައި ބާއްވާ ކޮންސެޓެއްގައި ބައިވެރިވާ އެލްކޭޖީ އަދި ޔޫކޭޖީގެ ދަރިވަރުންނަށް ނަށަން ދަސް ކޮށްދޭން ދެކޮޅު ހެދި ޓީޗަރުންނަށެވެ.
އެ ލިޔުމުގައިވާ ގޮތުގައި، ޓީޗަރުގެ މައިގަނޑު މަސްއޫލިއްޔަތުގެ ތެރޭގައި، މަންހަޖުގައި ބަޔާން ކޮށްފައިވާ ލަނޑުދަނޑިތައް ހާސިލްވާނެހެން ކަންކަން ކުރުމަށް އަންގާފައިވާނެ ކަމަށް ބުނެފައި ވެއެވެ.
"... އެކަންކަން ހާސިލު ކުރުމަށް ދަރިވަރުންނަށް ރާވާ ހިންގާ ހަރަކާތްތަކުގެ ތެރެއިން ބައެއް ކަންކަމަށް ފާޅުގައި ދެކޮޅު ހަދާ، އެކަންކަން ކުރުމަށް އިންކާރުކޮށް، އެކަމުގައި ސްކޫލުން އަންގާ އެންގުންތަކަށް ނުކިޔަމަންތެރިވެފައި ވާތީ..." ސަސްޕެންޑް ކުރި ސަބަބުގައި ބުނެފައި ވެއެވެ.
އެހެންކަމުން އެ މައްސަލައިގެ އިދާރީ ތަހުގީގެއް ހިންގަން ނިންމާފައިވާ ކަމަށް ލިޔުމުގައި އަންގާފައިވެ އެވެ. އެލްކޭޖީ އަދި ޔޫކޭޖީއަށް ކިޔަވައިދޭ ތިން ޓީޗަރުން ސަސްޕެންޑްކޮށްފައި ވަނީ ހަތް ދުވަހަށް އެކަމަކު މުސާރަ ހިނގާ ގޮތަށެވެ.
ކޮމެންޓް
Republic of Maldives