ދެ ގަޑިއިރަށްފަހު އިންޖީނުތައް ހިންގައި ބައެއް ސަރަހައްދުތަކަށް ކަރަންޓް

ގްރޭޓާ މާލެ ސަރަހައްދުން ކަރަންޓު ނެތި ދެ ގަަޑިއިރު ދިއުމަށްފަހު ބައެއް ސަރަހައްދުތަކަށް ކަރަންޓު ދޭން ފަށައިފި އެވެ. 

ސްޓެލްކޯއިން ބުނީ ކަރަންޓް ކެނޑުނީ ހުޅުމާލޭގެ 50 މެގަވޮޓްގެ ޕަވާ ޕްލާންޓްގެ ނިޒާމު އިތުރަށް ފުރިހަމަކޮށް، ދިގުމުއްދަތަކަށް ކަރަންޓުގެ ޚިދުމަތް އިތުބާރާއެކު ފޯރުކޮށްދިނުމަށްޓަކައި ރޭވިގެން ކުރިއަށްގެންދިޔަ ސިސްޓަމް އަޕްގްރޭޑް މަސައްކަތެއްގެ ތެރެއިން ދިމާވި މައްސަލައަކާ ގުޅިގެންނެވެ. 

އެ ކުންފުނިން ބުނީ ދިމާވި ޓެކްނިކަލް މައްސަލައަކާއި ގުޅިގެން ހިދުމަތް މެދުކެނޑުނު މާލެއާއި ހުޅުމާލޭގެ ބައެއް ސަރަހައްދުތަކަށް މިހާރު ވަނީ އަލުން ކަރަންޓު ދެވިފައި އެވެ.

"ނުދެވި ހުރި ސަރަހައްދުތަކަށް އަލުން ކަރަންޓު ދިނުމުގެ މަސައްކަތްތައް ދަނީ ކުރެވެމުން. ދިމާވާނެ ދަތިތަކަށް މަޢާފަށް އެދެން،" ސްޓެލްކޯއިން ބުނެފައިވެ އެވެ. 

މި އަޕްގްރޭޑް މަސައްކަތަށްފަހު ދިމާވި ޓެކްނިކަލް މައްސަލައެއްގެ ސަބަބުން، އިންޖީނުގޭގައި ހުރި ޖެނެރޭޓަރުތައް ވަނީ ރައްކާތެރިކަމުގެ ފިޔަވަޅެއްގެ ގޮތުން އޮޓޮމެޓިކުން ނިވިފައެވެ. މިއާއެކު، މާލެ އަދި ހުޅުމާލޭގެ ބޮޑު ބަޔަކުން އެއްވަގުތެއްގައި ވަނީ ކަރަންޓުގެ ހި ދުމަތް މެދުކެނޑިގެން ދިޔަ އެވެ. 

ސްޓެލްކޯއިން ބުނި ގޮތުގައި ޓެކްނިކަލް ޓީމުތަކުން މިހާރު ދަނީ ނިޒާމަށް ދިމާވި މައްސަލަ ހައްލުކޮށް، ގްރިޑް އާންމު ހާލަތަކަށް ގެނައުމަށްޓަކައި މެދުނުކެނޑި މަސައްކަތް ކުރަމުންނެވެ. އަދި ވީ އެންމެ އަވަހަކަށް ކަރަންޓުގެ ޚިދުމަތް ހުރިހާ ސަރަހައްދަކަށް ވެސް އަލުން ފޯރުކޮށްދެވޭނެ ކަމަށް އެ ކުންފުނިން ދީފައިވެ އެވެ. އަދި މި އަޕްގްރޭޑަކީ މާލެ ސަރަހައްދުގެ ކަރަންޓުގެ ނިޒާމު އިތުރަށް ހަރުދަނާކޮށް، ދިގުމުއްދަތަކަށް ސިސްޓަމްގެ ސްޓެބިލިޓީ ނުވަތަ ހަމަޖެހުން ހިފެހެއްޓުމަށްޓަކައި ކޮންމެހެން ކުރަންޖެހިގެން ކުރިއަށްގެންދިޔަ މުހިންމު މަސައްކަތެކެވެ.