މިލަންދޫގައި އެއާޕޯޓު އަޅަން ބޭނުންވާ ބިން ހިއްކާ ނިމިއްޖެ

ށ. މިލަންދޫގައި އެއާޕޯޓު އަޅަން ބޭނުންވާ ބިން ހިއްކުމުގެ މަސައްކަތް ނިންމާލައިފި އެވެ.

ރައީސް ޑރ. މުހައްމަދު މުއިއްޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ މިލަންދޫ އެއާޕޯޓު އެޅުމަށް ބޭނުންވާ ބިން ހިއްކައި ނިންމާލާފައި ވަނީ 31 ދުވަހުގެ ތެރޭގައި ކަމަށެވެ.

އެގޮތުން ރައީސް ވިދާޅުވީ އެއާޕޯޓު އެޅުމަށް ބޭނުންވާ ބިން ހިއްކުމުގެ މަސައްކަތް ފަށާފައި ވަނީ މިދިޔަ އޭޕްރީލް ތިންވަނަ ދުވަހު ކަމަށެވެ. އަދި އިއްޔެ އެ މަސައްކަތް އެއްކޮށް ނިންމާލާފައިވާ ކަމަށެވެ.

އެއާޕޯޓު އެޅުމަށް 21 ހެކްޓަރުގެ ބިން ހިއްކާފައިވާ ކަމަށާއި، އެ މަޝްރޫއުގެ ތެރެއިން މިލަންދޫން ގަސް ނެގީ 4.9 ހެކްޓަރުގެ ސަރަހައްދަކުން ކަމަށްވެސް ރައީސް ވިދާޅުވެފައިވެ އެވެ. 

އެ ބިން ހިއްކާފައި ވަނީ ކްއީން އޮފް ދަ ނެދަލެންޑްސް ކިޔާ ޑްރެޖަރެއް ބޭނުންކޮށްގެންނެވެ.

މިލަންދޫގައި އެއާޕޯޓެއް އެޅުމުގެ މަސައްކަތް އެމްއޭސީއެލްއާ ހަވާލުކޮށްފައި ވަނީ މިދިޔަ އަހަރުގެ އޮކްޓޯބަރު 15 ވަނަ ދުވަހު ރައީސް އެރަށަށް ކުރެއްވި ދަތުރުފުޅުގެ ތެރެއިންނެވެ.

މިއީ ށ. އަތޮޅުގައި އަޅާ ހަތަރުވަނަ އެއާޕޯޓެވެ. އެ ރަށުން ލޯންޗެެއްގައި 15 މިނެޓުން ދެވޭ ފުނަދޫގައި ވެސް އެއާޕޯޓެއް އޮވެ އެވެ.