އައިއައިޓީއީ ދަރިވަރުންގެ ޔޫނިއަން އިފްތިތާހުކޮށްފި

އައިލެންޑް އިންސްޓިޓިއުޓް އޮފް ޓާޝަރީ އެޑިއުކޭޝަން (އައިއައިޓީއީ) ގެ މި އަހަރުގެ ދަރިވަރުންގެ ޔޫނިއަން ރަސްމީކޮށް އިފްތިތާހުކުރުމުގެ ރަސްމިއްޔާތު ކުލަގަދަގޮތެއްގައި ބާއްވައިފިއެވެ. 

މިދިޔަ އޭޕްރިލް މަހުގެ 16 ވީ ބުރާސްފަތި ދުވަހުގެ ރޭ އިންޑިއަން ކަލްޗަރަލް ސެންޓަރު (އައިސީސީ) ގައި ބޭއްވި މި ރަސްމިއްޔާތުގައި މި އަހަރުގެ އެކަޑެމިކް އަހަރަށް އަލަށް އިންތިޚާބުވި ޔޫނިއަންގެ މެންބަރުންތައް ވަނީ ރަސްމީކޮށް މަގާމުތަކާ ހަވާލުވެފައެވެ.

މި ރަސްމިއްޔާތު ޝަރަފުވެރިކޮށްދެއްވީ އިންޑިއަން ކަލްޗަރަލް ސެންޓަރުގެ ފުރަތަމަ ޑައިރެކްޓަރު / ސެކްރެޓަރީ، މަންޖިސްތާ މުކަރްޖީ އެވެ. މީގެ އިތުރުން، އައިއައިޓީއީގެ ހުރިހާ މުވައްޒަފުންނާއި ގިނަ އަދަދެއްގެ ދަރިވަރުން މި ރަސްމިއްޔާތުގައި ބައިވެރިވެފައިވެއެވެ.

މި ރަސްމިއްޔާތު ބޭއްވުމުގެ މައިގަނޑު މަގްސަދުތަކުގެ ތެރޭގައި ޔޫނިއަންގެ މެންބަރުން ރަސްމީކޮށް އައްޔަންކުރުމާއި، މުއައްސަސާގެ ތެރޭގައި ދަރިވަރުންގެ ލީޑަރޝިޕް ވަރުގަދަކޮށް ހަރަކާތްތެރިކަން އިތުރުކުރުން ހިމެނެއެވެ. އަދި ދަރިވަރުންނާއި އިންސްޓިޓިއުޓްގެ މެނޭޖްމަންޓާ ދެމެދު އޮންނަ ގުޅުން ބަދަހިކޮށް، ގުޅިގެން މަސައްކަތްކުރުމަށް ހިތްވަރު ދިނުމަކީވެސް މި ރަސްމިއްޔާތުގެ މުހިންމު ބޭނުމެކެވެ.

މި ދަރިވަރުންނަށް މަގާމުގެ ލިޔުން ހަވާލުކޮށްދެއްވީ ރަސްމިއްޔާތުގެ ޝަރަފުވެރި މެހެމާނު މަންޖިސްތާ މުކަރްޖީއެވެ. އައިލެންޑް އިންސްޓިޓިއުޓް އޮފް ޓަރޝަރީ އެޑިއުކޭޝަންގެ މެނޭޖްމަންޓުގެ އުންމީދަކީ މި އާ ލީޑޝިޕާއެކު ދަރިވަރުންގެ އިތުރު ހަރަކާތްތަކަށް އާ ދިރުމެއް ލިބި، އިންސްޓިޓިއުޓްގެ ތަޢުލީމީ މާޙައުލު އިތުރަށް ފުރިހަމަވެގެންދާނެ ކަމަށެވެ.

މި ރަސްމިއްޔާތުގައި އައިއައިޓީއީ އާއި އިންޑިއަން ކަލްޗަރަލް ސެންޓަރާ ދެމެދު އޮންނަ ގުޅުން އިތުރަށް ހަރުދަނާކޮށް، ދެ ފަރާތް ގުޅިގެން ކުރިއަށްގެންދެވޭނެ ހަރަކާތްތަކާ ބެހޭގޮތުން ވެސް ވަނީ މަޢުލޫމާތު ހިއްސާކޮށްފައެވެ. އައިއައިޓީއީ އިން މަޢުލޫމާތު ދޭގޮތުގައި، މިފަދަ ޔޫނިއަންއެއް އިފްތިތާހު ކުރެވުމަކީ ދަރިވަރުންގެ ކުރިއެރުމަށާއި، ތަޢުލީމީ މާޙައުލުގައި ދަރިވަރުންގެ ބައިވެރިވުން އިތުރުކުރުމަށް އެޅުނު މުހިންމު ފިޔަވަޅެކެވެ. ރަސްމިއްޔާތު ނިމިގެންދިޔައީ އާ ޔޫނިއަންއާ އެކު އިންސްޓިޓިއުޓަށް އުންމީދީ ކުރިއެރުންތަކެއް ލިބިގެންދާނެ ކަމުގެ ޔަގީންކަމާ އެކުގައެވެ.