ބުލީ ކުރުން ޖިނާއީ ކުށަކަން ހަދަން މަސައްކަތް ކުރަނީ
އިހުސާން ވިދާޅުވީ، މީހުންގެ ފުރާނައަށް ނުރައްކާވެދާ މި ފަދަ ކުށްތަކަކީ ޖިނާއީ ކުށެއްގެ ގޮތުގައި ހެދުމަށްޓަކައި މަސައްކަތްކުރަމުން އަންނަ ކަމަށެވެ.
ރާއްޖޭގައި ފަހަކަށް އައިސް ބުލީ ކުރުމުގެ އެތައް މައްސަލައެއް ފެންތިމަތިވަމުން އަންނައިރު، އެކަން ހުއްޓުވުމަށްޓަކައި ބުލީ ކުރުމަކީ ޖިނާއީ ކުށަކަށް ހަދަން ބަންޑާރަނައިބުގެ އޮފީހާ އެކު މަސައްކަތް ކުރަމުން އަންނަ ކަމަށް ހޯމްލޭންޑް މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ބުލީ ކުރުން އިތުރުވުމާ ގުޅޭގޮތުން ކުރި ސުވާލަކަށް ޖަވާބު ދެއްވަމުން އިހުސާން ވިދާޅުވީ، މީހުންގެ ފުރާނައަށް ނުރައްކާވެދާ މި ފަދަ ކުށްތަކަކީ ޖިނާއީ ކުށެއްގެ ގޮތުގައި ހެދުމަށްޓަކައި މަސައްކަތްކުރަމުން އަންނަ ކަމަށެވެ.
"ބުލީ ކުރުމާ ގުޅޭގޮތުން އެޅިދާނެ ފިޔަވަޅުތަކަކީ ކޮބައިކަން ދެނެގަތުމަށް، ހާއްސަކޮށް ޖިނާއީ ގޮތުން އެޅިދާނެ ފިޔަވަޅެއް އެބައޮތްތޯ އަޅުގަނޑުމެން މިހާރު މިދަނީ އެޓާނީ ޖެނެރަލްގެ އޮފީހާއެކު މަސައްކަތްކުރަމުން،" އޭނާ ވިދާޅުވި އެވެ.
ބުލީ ކުރުމުގެ ސަބަބުން، މިދިޔަ ހޯމަ ދުވަހުގެ ރޭ ގައުމީ ޔުނިވާސިޓީގެ މާލޭގެ ދަނާލުގައި ދިރިއުޅެމުން 18 އަހަރުގެ ޒުވާން އަންހެން ކުއްޖަކު މަރުވި މައްސަލައެއް ވަނީ ހޫނުވެފަ އެވެ.
ކޮމެންޓް
Republic of Maldives