ހަންގޭރީގެ އާ ބޮޑު ވަޒީރު ހުންނެވީ ނަތަންޔާހޫ ހައްޔަރު ކުރާ ގޮތަށް

ހަންގޭރީގެ އިންތިހާބީ ބޮޑުވަޒީރު ޕީޓާ މަގްޔާރު ހުންނެވީ ބައިނަލްއަގުވާމީ ޖިނާއީ ކޯޓު (އައިސީސީ) އިން ނެރިފައިވާ ބެންޖަމިން ނަތަންޔާހޫ ހައްޔަރު ކުރުމުގެ އަމުރުތަކެއް ތަންފީޒު ކުރާ ގޮތަށް ކަމަށް ވިދާޅުވެއްޖެ އެވެ. 

ހަންގޭރީގެ ކުރީގެ ސަރުކާރުން އައިސީސީ އިން ވަކިވުމަށް ނިންމި ނިންމުން ބަދަލުކޮށް، ހަންގޭރީ އަލުން އެ ކޯޓާ ގުޅުމަށް ރާވާފައިވާކަން އޭނާ ވަނީ އިއުލާން ކުރައްވާފަ އެވެ. މި ސިޔާސަތުގެ ސަބަބުން، އައިސީސީ އިން ހައްޔަރު ކުރުމުގެ އަމުރު ނެރެފައިވާ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަށް ސީދާ އަސަރު ކުރާނެ އެވެ. 

މަގްޔާރު ވިދާޅުވި ގޮތުގައި އޭނާގެ ސަރުކާރުން އައިސީސީގެ އަމުރުތަކަށް ބޯލަނބާނެ އެވެ. މީގެ ސަބަބުން، މި އަހަރުގެ ފަހުކޮޅު ބުޑަޕެސްޓަށް ނަތަންޔާހޫ ކުރައްވަން ރާވާފައިވާ ދަތުރުފުޅުގައި ގާނޫނީ ގޮންޖެހުން ތަކެއް ކުރިމަތިވާނެ އެވެ. 

ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި މަގްޔާރު ކަށަވަރުކޮށްދެއްވި ގޮތުގައި 2025 ވަނަ އަހަރު ކުރީގެ ސަރުކާރުން 'ރޯމް ސްޓެޓިއުޓް' އިން ވަކިވުމަށް ނިންމި ނިންމުން ބަދަލުކޮށް، ހަންގޭރީ އަލުން އައިސީސީ އާ ގުޅޭނެ އެވެ. އަދި އަލުން މެންބަރަކަށް ވުމުން، ބައިނަލްއަގުވާމީ ގާނޫނީ ޒިންމާތައް އުފުލަންޖެހޭނެ ކަމަށް އޭނާ ވިދާޅުވި އެވެ.

"ކޯޓުގެ މެންބަރު ގައުމެއްގެ ސަރަހައްދަށް، ހޯދަން ބޭނުންވެފައިވާ މީހަކު ވަދެއްޖެނަމަ، އެމީހަކު ހައްޔަރު ކުރަންޖެހޭނެ. ކޮންމެ ގައުމަކަށް އަދި ސަރުކާރެއްގެ އިސްވެރިޔަކަށްވެސް މި ގާނޫނުތައް އެނގޭނެ،" މަގްޔާރު ވިދާޅުވި އެވެ.

މި ވާހަކަތައް އައިސްފައިވަނީ، 1956 ވަނަ އަހަރުގެ ހަންގޭރީ އިންގިލާބުގެ ހަނދާނީ މުނާސަބަތުގައި ބައިވެރިވެވަޑައިގަތުމަށް އަންނަ އޮކްޓޫބަރު މަހު ނަތަންޔާހޫ ކުރައްވާ ދަތުރުފުޅާ މެދު ސުވާލު އުފެދިފައިވާ ދަނޑިވަޅެއްގަ އެވެ. ގާޒާގައި ހިންގަމުން ގެންދާ ހަނގުރާމައިގެ ޖަރީމާތަކާއި އިންސާނިއްތާ ހިފާލު އަމަލުތަކާ ގުޅިގެން ނަތަންޔާހޫގެ މައްޗަށް ވަނީ އައިސީސީ އިން ހައްޔަރު ކުރުމުގެ އަމުރެއް ނެރެފަ އެވެ.