ވޯޓު އެއްވަރުވި ފަސް ދާއިރާގެ ދެވަނަ ބުރުން ޕީއެންސީއަށް ތިން ގޮނޑި

މި މަހުގެ އަށް ވަނަ ދުވަހު ބޭއްވި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ އިންތިހާބުގައި ވޯޓު އެއްވަރުވެގެން، ފަސް ދާއިރާއެއްގައި އިއްޔެ ބޭއްވި ދެވަނަ ބުރުގެ ވޯޓުލުމުގައި ކުރި ހޯދައި، ތިން ގޮނޑި ވެރިކަންކުރާ ޕީއެންސީން ކާމިޔާބުކޮށްފި އެވެ.

އިއްޔެ ވޯޓު ކުރިއަށް ގެންގޮސްފައިވަނީ، ބ. ދޮންފަނު ކައުންސިލާއި ފުވައްމުލަކު ދަޑިމަގު ދާއިރާއިން އަންހެނުންނަށް ހާއްސަކޮށްފައިވާ ގޮނޑި އާއި ހއ. ކެލާ އަންހެނުންގެ ކޮމިޓީގެ ރައީސް ކަމާއި ހދ. ނޭކުރެންދޫ އަދި ލ. މާވަށު އަންހެނުންގެ ކޮމިޓީއަށް މެމްބަރަކު އިންތިހާބު ކުރުމަށެވެ.

އިލެކްޝަންސް ކޮމިޝަން (އީސީ)އިން ރޭ އާންމުކޮށްފައިވާ ވަގުތީ ނަތީޖާތައް ދައްކާ ގޮތުގައި، އެ ފަސް ދާއިރާގެ ތެރެއިން ތިން ގޮނޑި ޕީއެންސީގެ ކެންޑިޑޭޓުން ކާމިޔާބުކޮށްފައިވާއިރު، އެއް ގޮނޑި އިދިކޮޅު އެމްޑީޕީއަށް އަދި އަމިއްލަ ގޮތުން ވާދަކުރި ކެންޑިޑޭޓަކު ވަނީ ކާމިޔާބުކޮށްފަ އެވެ.

އިއްޔެ ބޭއްވި ދެވަނަ ބުރުގައި، ވޯޓުލުމުގެ ހައްގު ޖުމްލަ 6،093 މީހުންނަށް ލިބިފައިވާއިރު، އޭގެ ތެރެއިން 4،389 މީހުން ވަނީ ވޯޓު ދީފައިވާ ކަމަށް އީސީން ބުންޏެވެ.