ކެބިނެޓަށް ބަދަލު ގެނައީ އިންތިހާބުގެ ނަތީޖާއާ ހެދި: ތަރުޖަމާނު
އެއީ ކުއްލި ނިންމެވުމެއް ނޫން ކަމަށާއި ރޭވުންތަކެއް ރާވައިގެން ނިންމި ނިންމުންތަކެއް ކަމަށް އޭނާ ވިދާޅުވި އެވެ.
ސަރުކާރުގެ ކެބިނެޓަށް ބަދަލު ގެނެސްފައި ވަނީ މިދިޔަ ލޯކަލް ކައުންސިލް އިންތިހާބާއި ރެފަރަންޑަމްގެ ނަތީޖާ އައި ގޮތުން ކަމަށް ރައީސް އޮފީހުގެ ތަރުޖަމާނު ކަމަށް އަލަށް އައްޔަން ކުރެއްވި މުހައްމަދު ޝަރީފް (މުންދު) ވިދާޅުވެއްޖެ އެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމަށް މިރޭ ދެއްވި އިންޓަވިއުއެއް މުންދު ވިދާޅުވީ ނިމިދިޔަ އިންތިހާބުގެ ނަތީޖާ އަށް އެއްގޮތުން ބަލާނަމަ ޕީއެންސީ ކާމިޔާބުވި ނަމަވެސް އިދިކޮޅު އެމްޑީޕީން ވެސް އެ އިންތިހާބު ކާމިޔާބުވި ކަމަށް ބެލެވިދާނެ ކަމަށެވެ.
އެ ނަތީޖާ ގަބޫލުފުޅު ކުރައްވައި ސަރުކާރު ހިންގުން ހަރުދަނާ ކޮށް އިސްލާހު ކުރައްވާނެ ކަމުގެ ޔަގީން ކަން ރައީސް ޑރ. މުހައްމަދު މުއިއްޒު ދެއްވި ކަމަށާއި މިހާރު އެ އަޅުއްވަމުން ގެންދަވަނީ އެ ފިޔަވަޅުތައް ކަމަށް މުންދު ވިދާޅުވި އެވެ.
"ސަރުކާރަކީ އުޅަނދެއް ނަމަ އެއަށް ވުރެ ބާރު ސްޕީޑެއްގައި ދާން ޖެހޭ. އޭގަ އިން އިންޖީނެއް ބަދަލުކުރަން ވިޔަސް." އޭނާ ވިދާޅުވި އެވެ.
ރައީސްގެ އެ ނިންމެވުންތަކަކީ ކުއްލިއަކަށް ހުރެފައި ނިންމި ނިންމުންތަކެއް ނޫން ކަމަށާއި އެއީ ވަރަށް ރަނގަޅު ރޭވުންތަކަކާ އެކީ ނިންމެވި ނިންމެވުންތަކެއް ކަމަށް މުންދު ވިދާޅުވި އެވެ. އެގޮތުން ސަރުކާރުގެ ބައެއް މިނިސްޓްރީތަކުގެ މެންޑޭޓު ބަދަލު ކުރުމުގެ އިތުރުން ސްޓްރަކްޗާ އަށް ބޮޑެތި ބަދަލުތަކެއް ގެންނަވާފައިވާ ކަމަށް އޭނާ ވިދާޅުވި އެވެ.
އޭގެ އިތުރުން ސިޔާސީ މަގާމްތަކަށް އައްޔަން ކުރައްވާފައި ތިއްބެވި ބޭފުޅުންގެ އެސެސްމަންޓުތަކެއް ހަދައި އެކަށީގެންވާ މަސައްކަތްތައް ނުކުރައްވާ ފަރާތްތައް ވަކި ކުރައްވާނެ ކަމަށް ވެސް މުންދު ވިދާޅުވި އެވެ.
އިންތިހާބުގެ ނަތީޖާ އަށް ފަހު 10 މިނިސްޓަރުން ވަނީ މަގާމުން އިސްތިއުފާ ދެއްވައިފަ އެވެ. މިނިސްޓްރީތަކުގެ އަދަދު މަދު ކުރުމުގެ އިތުރުން ބައެއް ކުންފުނިތަކުގެ ވެރިން ވެސް ވަނީ ބަދަލު ކުރައްވައިފަ އެވެ.
ކޮމެންޓް
Republic of Maldives