އެގްރިކަލްޗާ، ފިޝަރީޒް އާ އެއްކޮށްލައި، މިނިސްޓަރަކަށް ޝިޔާމް އަލުން އައްޔަނުކުރައްވައިފި

ސަރުކާރު ހިންގުމަށް ރައީސް ޑރ. މުހައްމަދު ގެންނަވަމުންދާ ބަދަލުތަކުގެ ތެރެއިން، އެގްރިކަލްޗާ މިނިސްޓްރީ އާއި ފިޝަރީޒް މިނިސްޓްރީ އެއްކޮށްލައި، މިނިސްޓަރަކަށް އަހުމަދު ޝިޔާމް އަލުން އައްޔަނުކުރައްވައިފި އެވެ.

ނިމިދިޔަ ލޯކަލް ކައުންސިލް އިންތިހާބުގައި ވެރިކަންކުރާ ޕީއެންސީއަށް ލިބުނު ބޮޑު ނާކާމިޔާބީ އާ ގުޅިގެން، ރައްޔިތުން އެދޭ ގޮތަށް ސަރުކާރުގެ ހިންގުމަށް ބޮޑެތި ބަދަލުތައް ގެންނަވާނެކަމަށް ރައީސް ވިދާޅުވެފައިވަނިކޮށް، ކެބިނެޓުގެ 10 މިނިސްޓަރަކު އިއްޔެ ވަނީ ކުއްލި ގޮތަކަށް އިސްތިއުފާ ދެއްވައިފަ އެވެ.

އެއާ އެކު، ރޭ ރައީސް އޮފީހުގައި ބޭއްވި ރަސްމިއްޔާތެއްގައި ވަނީ، މިނިސްޓްރީތަކުގެ މެންޑޭޓަށް ގެންނެވި ބަދަލުތަކާއެކު، ކެބިނެޓު އަލުން އެކުލަވާލައްވައި، އާ މިނިސްޓަރުން މަގާމުތަކަށް އައްޔަނުކުރައްވައިފަ އެވެ.

ސަރުކާރު ހިންގަމުން އައި 20 މިނިސްޓްރީ، 15 އަށް ކުޑަކުރައްވައި، ރޭ ވަޒީރުން އައްޔަނުކުރެއްވި އިރު ފިޝަރީޒް މިނިސްޓަރު އައްޔަނުކުރައްވާފައެއް ނުވެ އެވެ.

އެނގިފައިވާ ގޮތުގައި، ރޭ ފިޝަރީޒް މިނިސްޓަރަކު އައްޔަނުނުކުރެއްވުނީ، ޝިޔާމް ރާއްޖޭން ބޭރުގައި ހުންނެވުމުންނެވެ.

އެގޮތުން، ރައީސް މުއިއްޒު މިއަދު ވަނީ، މިނިސްޓާ އޮފް ފިޝަރީޒް، އެގްރިކަލްޗާ އެންޑް އޯޝަން ރިސޯސަސް ކަމަށް ޝިޔާމް އައްޔަނުކުރައްވައިފަ އެވެ.

އެއާ އެކު، ކުރިން އެގްރިކަލްޗާ އަދި އެނިމަލް ވެލްފެއާގެ ނަމުގައި ހިންގަމުން އައި މިނިސްޓްރީ ވަނީ، ފިޝަރީޒް އެންޑް އޯޝަން ރިސޯސަސް އާ އެއްކޮށްލައްވައިފަ އެވެ.

އަލަށް އެކުލަވައިލި ކެބިނެޓުގައި އާ ހަތަރު ބޭފުޅަކު ހިމެނިވަޑައިގަންނަވަ އެވެ.

މިގޮތުން، ފޮރިން މިނިސްޓަރަކަށް އައްޔަނުކުރައްވާފައިވަނީ، އިނގިރޭސިވިލާތުގައި ހުންނަވާ ދިވެހި ސަފީރު އިރުތިޝާމް އާދަމް އެވެ.

ރައީސް އޮފީހުގެ އިސް ތަރުޖަމާނުކަމުގައި ހުންނެވި ހީނާ ވަލީދު ވަނީ ކަލްޗާ މިނިސްޓަރަކަށް އައްޔަނުކުރައްވައިފަ އެވެ. އަދި ހެލްތު މިނިސްޓަރަކަށް އައްޔަނުކުރެއްވީ، ބެލްޖިއަމްގައި ހުންނަވާ ދިވެހި ސަފީރު ގީލާ އަލީ އެވެ.

އެންވަޔަރަމަންޓް މިނިސްޓްރީ ހަވާލުކުރެއްވީ ކުރީގެ ކްލައިމެޓް އެޑްވައިޒަރު އަލީ ޝަރީފްއާ އެވެ.

މިހާތަނަށް ރައީސް އަދި ޑިފެންސް މިނިސްޓަރަކާއި ބަންޑާރަ ނައިބެއް އައްޔަނުކުރައްވާފައެއް ނުވެ އެވެ.

މިނިސްޓްރީތަކުގެ މެންޑޭޓަށް ގެންނެވި އެންމެ ފާހަގަކޮށްލެވޭ ބަދަލަކީ، ލޯކަލް ގަވަމަންޓު މިނިސްޓްރީ އުވާލެއްވުމެވެ.