ހަރަދު ކުޑަކުރަން ސަރުކާރުގެ މުއްބާރު | ކުންފުނިތަކުން ފިޔަވަޅުތަކެއް
ފީސީބީން އަޅަން އެނގި ބައެއް ފިޔަވަޅުތަކުގެ ތެރޭގައި ރަސްމީގަޑީގައި މަސައްކަތްތައް ނިންމޭ ގޮތަށް ކަންކަން ރޭވުމާއި މުވައްޒަފުންނަށް މަގާމުގެ ކުރިއެރުން ދިނުން ހުއްޓާލުން އަދި މުވައްޒަފުން ނެގުން ހުއްޓާލުންފަދަ ގިނަ ފިޔަވަޅުތައް ހިމެނޭ
މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދައުލަތުގެ އާމްދަނީއަށް އަސަރު ކުރަމުންދާތީ ހަރަދު ކުޑަކުރަން ސަރުކާރު ހިއްސާވާ ކުންފުނިތަކުން ބައެއް ފިޔަވަޅުތައް އަޅަން ޕްރައިވެޓައިޒޭޝަން ބޯޑުން ކުންފުނިތަކަށް އަންގައިފި އެވެ.
ސަރުކާރު ކުންފުނިތައް ބަލަހައްޓާ މައި ބޮޑީ ކަމަށްވާ ޕީސީބީން ނެރުނު ސާކިއުލާއެއްގައި ވަނީ މުވައްޒަފުންގެ މުސާރަ އާއި އިނާޔަތްތަކަށް ކުރާ ހަރަދު ބޮޑުތަނުން ކުޑަކުރަން އަޅަންޖެހޭ އެންމެހައި ފިޔަވަޅުތައް އެޅުން ހިމެނޭހެން ބައެއް ފިޔަވަޅުތައް އަޅަން ކުންފުނިތަކަށް އަންގާފަ އެވެ.
އަޅަން އެނގި ފިޔަވަޅުތައް
- ރަސްމީގަޑީގައި މަސައްކަތްތައް ނިންމޭ ގޮތަށް ކަންކަން ރޭވުން
- ރަސްމީގަޑީގެ ބޭރުން ކޮންމެހެން ކުރަންޖެހޭ މަސައްކަތްތަކަށް ނޫނީ އިތުރު ގަޑީގެ މަސައްކަތް ނުކުރުން.
- މުވައްޒަފުންނަށް މަގާމުގެ ކުރިއެރުން ދިނުން ހުއްޓާލުން.
- އެ ކުންފުންޏަކުން މިހާރު ފާސްކޮށްފައިވާ އިދާރީ އޮނިގަނޑުގައި ހިމެނޭ މަގާމުތައް ކަމަށް ވިޔަސް އޮޕަރޭޝަންތައް ނުހުއްޓި ކުރިއަށް ގެންދަން ކޮންމެހެން މުހިންމު ނޫން މަގާމުތަކަށް މީހުން ނުނެގުން.
- މުވައްޒަފުންގެ މުސާރައިގެ ހަރަދުތައް މެނޭޖުކުރުން.
- ކޮންމެހެން ބޭނުންވާ ހަފުލާތައް ނޫނީ ނުބޭއްވުން.
- ރާއްޖެ އިން ބޭރަށް ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ހުއްޓާލުން.
- އޮންލައިންކޮށް ބައްދަލުވުންތަކުގައި ބައިވެރިވުން.
- ރާއްޖެ އިން ބޭރަށް ކުރާ ދަތުރުތަކުގައި ކުންފުނިން ކުރާ ހަރަދު ކުޑަކުރުން
- ރާއްޖެ އިން ބޭރަށް ކުރާ ތަމްރީނު ދަތުރުތައް ހުއްޓާލައޮ އޮންލައިންކޮށް ތަމްރީންތަކުގައި ބައިވެރިވުން
- ފެރީގެ ހިދުމަތް ލިބޭ ސަރަހައްދުތަކުގައި ފެރީތަކުގައި ކުންފުނިތަކުގެ މުވައްޒަފުން ދަތުރުކުރުން.
- ކުންފުނިތައް ހިންގަން އިޔާދަކުރަނިވި ހަކަތަ ބޭނުންކުރެވެން ހުރި ނަމަ އެ ނިޒާމު ބޭނުންކުރުން.
ޕީސީބީން އަޅަން އަންގާފައިވާ އެހެން ފިޔަވަޅުތަކުގެ ތެރޭގައި ކުންފުނީގެ ހިންގާ ގަވާއިދާއި އަސާސީ ގަވާއިދުގައި ބުނާ މަސްއޫލިއްޔަތުތައް އަދާކުރުމަށްޓަކައި ކޮންމެހެން ކުރަންޖެހޭ ހަރަދުތައް ފިޔަވައި އެހެނިހެން ހަރަދުތައް ނުކުރާކަން ޔަގީން ކުރުމުގެ ފިޔަވަޅުތައް އެޅުން ހިމެނެ އެވެ.
ހަނގުރާމައާ ގުޅިގެން އެކުލަވާލި ކޮމެޓީން އެންމެފަހުން ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު މޫސާ ޒަމީރު ވަނީ ހަރަދު ކުށަކުރަން ބައެއް ފިޔަވަޅުތައް އަޅަން ފަށާފައިވާކަމަށް ބުނެފަ އެވެ. މިގޮތުން ސަރުކާރުން ބޭރަށް ކުރާ ރަސްމީ ދަތުރުތައް ވަނީ ހުއްޓާލާފަ އެވެ. މީގެ އިތުރުންވެސް ހަނގުރާމަ ދިގުދެމިގެންދާނަމަ ދިރާސާކޮށް ފިޔަވަޅުތައް އަޅާނެ ކަމަށް ސަރުކާރުން ވަނީ ބުނެފަ އެވެ.
ކޮމެންޓް
Republic of Maldives