ފޯރިގަދަ ކެމްޕޭނު ނިންމާލައިފި

މާދަމާ އޮންނަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިހާބުގެ ކެމްޕެއިން ނިންމާލައިފި އެވެ.

މާލޭގެ އިތުރުން މުޅި ރާއްޖޭގައި މިއަދު ހަވީރު ވަނީ އެންމެ ފަހުގެ ކެމްޕޭނު ހަރަކާތް ހިންގުމުގެ ގޮތުން ހިނގާލުން ބާއްވާފަ އެވެ. ކެމްޕޭނު ނިންމާލާފައި ވަނީ އިރުއޮއްސި 6 ޖެހުމުންނެވެ.

މާލޭގައި ބޭއްވި ކޮންގްރެސް ޕާޓީގެ ކެމްޕޭނު ހަރަކާތުގައި ރައީސް ޑރ. މުހައްމަދު މުއިއްޒުގެ ދެކަނބަލުންނާއި، ޕާޓީން ކުރިމަތިލާފައިވާ ކެނޑިޑޭޓުންގެ އިތުރުން ސަރުކާރުގެ އިސްވެރިން ވަނީ ބައިވެރިވެވަޑައިގެންފަ އެވެ.

އިދިކޮޅު އެމްޑީޕީގެ ކެމްޕޭނު ހަރަކާތުގައި ވެސް ޕާޓީގެ އިސްވެރިންގެ އިތުރުން ކުރީގެ ރައީސް މުހައްމަދު ނަޝީދުވެސް ވަނީ ބައިވެރިވެވަޑައިގެންފަ އެވެ.

މި އިންތިހާބުގެ ކެމްޕޭނު މުޅި ރާއްޖޭގައި ވެސް ވަރަށް ފޯރިގަދަކޮށް ކުރިއަށް ގެންގޮސްފައިވެ އެވެ. ކައުންސިލް އިންތިހާބުގެ އިތުރުން، ރިޔާސީ އިންތިހާބާއި ރައްޔިތުންގެ މަޖިލީސް އިންތިހާބު އެއްކޮށްލުމާ ގުޅޭ ގޮތުން ރައްޔިތުންގެ ހިޔާލު ހޯދުމަށް ނަގާ ވޯޓާ ގުޅޭ ކެމްޕޭނު ވެސް ކުރިއަށް ގެންގޮސްފައިވެ އެވެ.

ރާއްޖޭގެ ހުރިހާ ހިސާބެއްގައިވެސް ވޯޓުލުން އޮންނާނީ މާދަނާ ހެނދުނު 8:00 އިން ހަވީރު 4:00 އަށެވެ. މިއަދު އިރުއޮއްސި 6 އިން ފެށިގެން ކެމްޕޭނުގެ އެއްވެސް ހަރަކާތެއް ހިންގުމަކީ މަނާކަމެކެވެ.

މި އިންތިހާބުގައި ރަށު ކައުންސިލްތަކަށް 626 ކައުންސިލަރުން އަދި ސިޓީ ކައުންސިލްތަކަށް 52 ކައުންސިލަރުން އިންތިހާބު ކުރުމަށް ހަމަޖެހިފައިވާއިރު، ޑަބްލިޔުޑީސީތަކަށް ވެސް ހަމަ އެ އަދަދަށް މެންބަރުން އިންތިހާބު ކުރެވޭނެ އެވެ.