އާސަންދައިން ދޭ އެމްބިއުލާންސުގެ ހިދުމަތް ފުޅާކޮށްފި

ދައުލަތުގެ ސިއްހީ ނިޒާމު، އާސަންދަ ސްކީމް މެދުވެރިކޮށްދޭ އެމްބިއުލާންސުގެ ހިދުމަތް މިހާރަށްވުރެ ފުޅާކޮށް ލިބޭނެ ގޮތަށް ބަދަލު ގެނެސްފި އެވެ. 

ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމެއްގައި ރައީސް ޑރ. މުހައްމަދު މުއިއްޒު ވިދާޅުވީ ގިނަ ބަޔަކު އެދެމުންދާތީ، އާސަންދަ ސްކީމުގެ ތެރެއިން އަންނަ މަހުގެ އެއްވަނަ ދުވަހުން ފެށިގެން އެމްބިއުލާންސުގެ ހިދުމަތް މިހާރަށްވުރެ ފުޅާކުރަން ނިންމާފަ އެވެ. އަދި މި ބަދަލު ގެންނަން ނިންމީ ގިނަކު އެދެމުންދާތީ އެވެ. މިހާރު އާސަންދަ މެދުވެރިކޮށް ދޭ އެމްބިއުލާންސުގެ ހިދުމަތް ލިބެނީ މަދު ހިދުމަތް ތަކަށެވެ. 

ރައީސް މުއިއްޒު ވިދާޅުވި ގޮތުގައި މިގޮތުން އަންނަ ބަދަލާއެކު، އިމަޖެންސީގައި ކުއްލި ހާލަތުގައި ހޮސްޕިޓަލަށް ގެންނަ ބަލި މީހާ އާއި ނިޔާވެގެން ގެންދާ މައްޔިތާގެ ހަށިގަނޑު އުފުލުންވެސް މި ސްކީމުން ކަވަރު ކުރާނެ އެވެ. މީގެ އިތުރުން ވީލް ޗެއާގައި ގެންނަ ބަލި މީހުންނާއި އެކި ކަހަލަ ނުކުޅެދުންތެރިކަން ހުންނަ މީހުން އަދި އިމަޖެންސީ ހާލަތުގައި އިވޭކްރޭޓް ކުރަން ޖެހޭ ހާލަތްތަކުގައިވެސް މި ސްކީމުން ކަވަރު ކުރާނެ އެވެ.

"މި ބަދަލު ގެންނަން ނިންމާފައިވަނީ ވަރަށް ޓެކްނިކަލް ލެވަލްއެއްގައި އެކި އޭންގަލްތަކުން މަޝްވަރާ ކުރުމަށްފަހު. މިއީ ގިނަ ބަޔަކަށް ދަތިވެގެން ލުއިތަކެއް ބޭނުންވާތީ އެކަމަށް މަޝްވަރާކޮށް މިއީ ލުއިތަކެއް ބޭނުންވާ ކަމަށްވާތީ،" ރައީސް ވިދާޅުވި އެވެ. 

މިދިޔަ އަހަރު އާސަންދައިން ހަރަދު ކުރަން ކަނޑައެޅީ 1.1 ބިލިއަން ރުފިޔާ އެވެ. ނަމަވެސް މިދި އަހަރު ނިމުނުއިރު ޖުމްލަ ހަރަދު 2.3 ބިލިއަން ރުފިޔާއަށް ވުރެ މައްޗަށް އަރާފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކަ އެވެ.