ލ. ގަމާއި ކުޅުދުއްފުށީގައި ހައުސިން ޔުނިޓު އަޅަން ތައްޔާރުވެއްޖެ

ލ. ގަމާއި ކުޅުދުއްފުށި ސިޓީގައި ހައުސިން ޔުނިޓުތައް އެޅަން ތަކެތި ގެންގޮސް ތައްޔާރު ވެއްޖެ އެވެ. 

މި ސަރުކާރުން ގަމުގައި އަޅަން ނިންމާފައި ވަނީ 100 ހައުސިން ޔުނިޓެވެ. އަދި ކުޅުދުއްފުށީގައި 400 ހައުސިން ޔުނިޓެވެ.

އެ މަޝްރޫއު ހަވާލު ކޮށްފައިވާ ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން ބުނީ ގަމުގައި ހައުސިން ޔުނިޓު ބޭނުންވާ މެޝިނަރީ އާއި މެޓީރިއަލްސްގެ ފުރަތަމަ ޝިޕްމަންޓް އެ ރަށަށް ގެންގޮސްފައިވާ ކަމަށެވެ.

ކުޅުދުއްފުށީގައި ހިންގާ މަޝްރޫއުގެ ސައިޓް މޮބިލައިޒް ކުރުމަށް ބޭނުންވާ ސާމާނު މިދިޔަ ހަފްތާގެ ތެރޭގައި އެ ރަށަށް ގެންގޮސްފައިވާ ކަމަށް އެ ކުންފުނިން ބުންޏެވެ.

ކުޅުދުއްފުށީގައި ބޯހިޔާވަހިކަން ހައްލު ކުރުމަށް 2،000 ހައުސިން ޔުނިޓް އެޅުމަށް ރައީސް ޑރ. މުހައްމަދު މުއިއްޒު ވަނީ ވައުދުވެވަޑައިގެންފަ އެވެ.

އެގޮތުން އެ މަޝްރޫއު އެޗްޑީސީ އާ ހަވާލު ކުރީ މިދިޔަ އަހަރުގެ އޮގަސްޓުގައި ރައީސް އެ ރަށަށް ކުރެއްވި ދަތުރުފުޅުގަ އެވެ.