ގަލްފުގެ އާންމު ވަސީލަތްތަކަށް ހަމަލާދޭތީ ރާއްޖޭގެ ކަންބޮޑުވުން، ހަނގުރާމަ ހުއްޓުވަން ގޮވާލައިފި

ސައުދީ އަރަބިއްޔާ، ޔުނައިޓެޑް އެރަބް އެމިރޭޓްސް، ޤަތަރު، ބަހްރެއިން، ކުވެއިތު، އޮމާން، އުރުދުން ގެ އާންމުން ދިރިއުޅޭ ސަރަޙައްދުތަކަށާއި މުހިންމު ވަޞީލަތްތަކަށް އަމާޒުކޮށް، އީރާނުން ދެމުންދާ ނުރައްކާތެރި ހަމަލާތައް ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފި އެވެ.

ސްވިޒަލޭންޑްގެ ޖެނީވާގައި މިއަދު ކުރިއަށްދިޔަ އ.ދ. ގެ އިންސާނީ ހައްގުތަކާބެހޭ މަޖިލީހުގެ 61 ވަނަ ދައުރުގެ 44 ވަނަ ބައްދަލުވުމުގައި ވާހަކަފުޅު ދައްކަވަމުން، ޖެނީވާގައި ހުންނަ އދ. ގެ އޮފީސްތަކަށް ކަނޑައަޅުއްވާފައި ހުންނަވާ ދިވެހިރާއްޖޭގެ ދާއިމީ މަންދޫބު ޑރ. ސަލްމާ ރަޝީދު ވަނީ، ގަލްފު ސަރަހައްދުގައި އަސްކަރީ ނުތަނަވަސްކަން އިތުރުވަމުންދާތީ އެކަމާ މެދު ދިވެހިރާއްޖެއިން އިންތިހާއަށް ކަންބޮޑުވާކަން ހާމަކުރައްވާފަ އެވެ.

އެ ސަރަޙައްދުގައި މިހާރު ހިނގަމުންދާ ހަމަނުޖެހުންތަކުގެ ސަބަބުން ކުރިމަތިވަމުންދާ އިންސާނީ އަދި އިޤްތިޞާދީ ނޭދެވޭ އަސަރުތަކާއި އަދި އީރާނަށް ދެމުންގެންދާ ޣައިރު ޤާނޫނީ ޙަމަލާތަކާމެދު ދިވެހިރާއްޖޭން އިންތިހާއަށް ކަންބޮޑުވާކަމަށް އެ ބަޔާނުގައި ބުންޏެވެ.

އަދި އެ ސަރަޙައްދުގެ ސުލްހަޔާއި، ހަމަޖެހުމާއި، އަދި ރައްކާތެރިކަން އަލުން ޤާއިމުކުރުމަށްޓަކައި، ވަގުތުން ހަމަލާތައް ހުއްޓާލުމަށް ބައިނަލްއަޤްވާމީ މުޖުތަމަޢުން ކުރަމުންދާ ސިޔާސީ އަދި ޚާރިޖީ މަސައްކަތްތައް އިތުރަށް ވަރުގަދަކުރުމަށް ދިވެހި ސަރުކާރުން ވަނީ ގޮވާލައިފަ އެވެ.

ކުއްލި ބަހުސްގެ ތެރެއިން ހުށަހެޅި "ހިއުމަން ރައިޓްސް އިމްޕްލިކޭޝަން އޮފް ދަ އިސްލާމިކް ރިޕަބްލިކް އޮފް އިރާންސް އަންޕްރޮވޯކްޑް އެޓޭކްސް އަގައެންސްޓް ބަހްރެއިން، ކުވެއިތު، އޯމާން، ޤަޠަރު، ސަޢޫދީ ޢަރަބިއްޔާ، ޔުނައިޓެޑް ޢަރަބް އެމިރޭޓްސް އެންޑް ޖޯޑަން" ޤަރާރު ދިވެހިރާއްޖެއިން ވަނީ ކޯ-ސްޕޮންސާ ކޮށްފަ އެވެ.