ބަހްރޭންގައި އާއްމުން ޒަހަމްވީ އެމެރިކާގެ މިސައިލަކުންކަން ހާމަ ވެއްޖެ

މި މަހުގެ 9 ވަނަ ދުވަހު ބަހްރޭނުގެ މަހައްޒާ ސަރަހައްދަށް އެރި މިސައިލަކީ އެމެރިކާގެ އަސްކަރިއްޔާއިން އޮޕަރޭޓްކުރާ "ޕެޓްރިއަޓް" މިސައިލް ޑިފެންސް ސިސްޓަމަކުން ފޮނުވާލި މިސައިލެއް ކަމަށް ދިރާސާ ކުރާ ފަރާތްތަކުން ހާމަކޮށްފި އެވެ.

ރޮއިޓާސް އިން ބުނި ގޮތުގައި އިރާނާއި އެމެރިކާއާ ދެމެދު ހިނގަމުންދާ ހަނގުރާމައިގެ ތެރެއިން ދިން މި ހަމަލާގައި ބަހްރޭނުގެ ސިޓްރާ އައިލެންޑްގެ އާންމުން ދިރިއުޅޭ ސަރަހައްދަކަށް ބޮޑެތި ގެއްލުންތަކެއް ލިބި، ކުޑަކުދިން ހިމެނޭހެން 32 މީހަކު ވަނީ ޒަހަމްވެފަ އެވެ.

އެމެރިކާގެ މިޑްލްބަރީ އިންސްޓިޓިއުޓްގެ ދިރާސާވެރިނާ ހަވާލާދީ ރޮއިޓާސް އިން ބުނި ގޮތުގައި ސެޓެލައިޓް ފޮޓޯތަކާއި ވީޑިއޯތަކުން އެނގޭ ގޮތުގައި މި މިސައިލް ފޮނުވާލާފައިވަނީ ހާދިސާ ހިނގި ތަނާ ހަތް ކިލޯމީޓަރު ދުރުގައި ހުރި އެމެރިކާގެ ބޭހަކުންނެވެ. ކުރިން މި ހަމަލާއަކީ އިރާނުގެ ޑްރޯން ހަމަލާއެއް ކަމަށް ބުނި ނަމަވެސް، ބަހްރޭން ސަރުކާރުން މިހާރު ވަނީ އެ ހާދިސާގައި ޕެޓްރިއަޓް މިސައިލެއް ބޭނުންކުރެވުނު ކަމަށް ފުރަތަމަ ފަހަރަށް އެއްބަސްވެފަ އެވެ.

ބަހްރޭނުން ބުނާ ގޮތުގައި ޕެޓްރިއަޓް މިސައިލް ބޭނުންކުރީ އިރާނުގެ ޑްރޯނެއް ހުއްޓުވުމަށެވެ. ނަމަވެސް، އެ ސަރަހައްދުގައި އޮންނަ ތެޔޮ ސާފުކުރާ ކާރުހާނާއަށް ދިން ހަމަލާތައް ހުއްޓުވުމުގައި މި ސިސްޓަމް ނާކާމިޔާބުވިކަން ފާހަގަކުރެވެއެވެ.

ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި، މަހައްޒާގެ މަގުތަކުގައި ވަނީ އިމާރާތްތަކުގެ ކުނިތައް ފެތުރިފައެވެ. ގޮވުމުގެ ބާރުގަދަކަމުން ގިނަ އަދަދެއްގެ ގޭގޭގެ ފުރާޅުތަކާއި ކުޑަދޮރުތައް ވަނީ ހަލާކުވެފައެވެ.

އެމެރިކާގެ ޕެންޓަގަންއިން މިކަމާ ގޮތުން ސީދާ ޖަވާބެއް ދީފައި ނުވާއިރު، ވައިޓް ހައުސްއިން ބުނެފައިވަނީ އެމެރިކާގެ އަސްކަރިއްޔާއިން ދުވަހަކު ވެސް އާންމުންނަށް އަމާޒުކޮށް ހަމަލާ ނުދޭނެ ކަމަށެވެ. ނަމަވެސް، މި ހަނގުރާމައިގައި ބޭނުންކުރާ އަގުބޮޑު މިސައިލްތަކުގެ ސަބަބުން އާންމުންނަށް ކުރިމަތިވާ ނުރައްކާ ބޮޑުވަމުންދާކަމަށް މުހައްލިލުން ބުނެ އެވެ.