ކެމިކަލް ގުދަނުގައި ރޯވި ސަބަބު ހޯދަން ހާއްސަ ތަހުގީގެއް ފަށައިފި

މާފަންނުގައި ހުންނަ ކުރީގެ ޑްރަގް ކޯޓާ ޖެހިގެން ހުރި ކެމިކަލް ގުދަނެއްގައި ރޭ އަލިފާން ރޯވި ސަބަބު ދެނެގަތުމަށް ހާއްސަ ފުލުހުންގެ ތަހުގީގެއް ފަށައިފި އެވެ.

އަލިފާން ރޯވެފައި ވަނީ 'ޕްރައިމް ފާޓިލައިޒާ މޯލްޑިވްސް ޕްރައިވެޓް ލިމިޓެޑް'ގެ ގުދަނެއްގަ އެވެ. 

ރޭ ގާތްގަނޑަކަށް 10 ޖަހާއިރު ހިނގި މި ހާދިސާގައި އެ ގުދަން ވަނީ އެއްކޮށް އަނދާ އަޅިއަށްވެފަ އެވެ. އެތަނުގައި އެކި ބާވަތްތަކުގެ ގަސްކާނާއާއި، ޕެސްޓިސައިޑްސްގެ އިތުރުން ދަނޑުވެރިކަން ކުރާ ސާމާނާއި ޖަނަރޭޓަރެއްވެސް ހުއްޓެވެ.

ފުލުހުން މިއަދު ނެރުނު ބަޔާނެއްގައި ބުނީ އެތަނުގައި ރޯވި އަލިފާން ނިއްވުމުގައި އުޅުނު ސިފައިންގެ މީހަކަށް އަނިޔާވެގެން ހޮސްޕިޓަލަށް ގެންގޮސް ފަރުވާ ދީފައިވާ ކަމަށެވެ. 

"މި ހާދިސާގެ ސަބަބުން ގުދަނަށާއި އެތަނުގައި ހުރި މުދަލަށް ބޮޑެތި ގެއްލުންތަކެއް ލިބިފައިވާއިރު، އެ ސަރަހައްދުގައި ހުރި 13 ސައިކަލަކަށާއި، ޕިކަޕަކަށާއި ކުންފުނީގެ ވެހިކަލަކަށް އެކިވަރުގެ ގެއްލުންތައް ލިބިފައިވޭ،" ފުލުހުން ބުންޏެވެ.

ރައްކާތެރި ގޮތުންނާއި އެތަނުގައި ހުރި ކެމިކަލްގެ ސަބަބުން އުފެދުމުގެ ދުމުގެ އަސަރުކޮށްފާނެތީ އެ ސަރަހައްދުގައި ދިރިއުޅޭ 77 މީހަކަށް އެންޑީއެމްއޭއިން ވަގުތީ ބޯހިޔާވަހިކަން ވަނީ ފޯރުކޮށްދީފައެވެ.

"ފުލުހުން މިހާރު ގެންދަނީ ސީން ޕްރޮސެސް ކުރުމުގެ މަސައްކަތް ކުރަމުން. އަދި މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ހާއްސަ ތަހުގީގެއް ވަނީ ފަށާފައި،" ފުލުހުން ބުންޏެވެ.